Milan-ah Mourinho tel lohna Roma

Pathianni zan dar 1:15 hian AC Milan chuan Serie A match khel turin AS Roma an lo mikhual dawn, manager thawm na tak Jose Mourinho chu an league match hnuhnungah hnawhchhuah a nih avangin a inlan ve thei dawn lo.

Kar hmasa khan Roma hi Atalanta nen an inhnehtawk, he inkhelah hian hrem a ni. Inter Milan manager hlui hian San Siro hi 'Ka In' tiin a lo sawi tawh ṭhin, tunah erawh a lut thei dawn lo. Nikum October thla khan Inter Milan nen an inkhelhin hrem a lo tawk tawh bawk.

Roma tan chanchin lawmawm lo dang a awm, manager Mourinho-a'n a ho theih dawn loh bakah forward ṭha Paulo Dybala chu hliam vangin a dinhmun a chiang lo mek.

Argentina international hi kar laihawla Laizo nen Coppa Italia quarterfinal an khelh ṭumin a inhliam a, thlak a nghai. Tun season chhungin Dybala hi vawi thum a inhliam tawh, a hliam vangin match sarih khelh theih loh a nei tawh a ni.

Roma ang thoin Milan hi Italian Cup aṭanga tla hlim an ni ve bawk a, an rilru natna thawi dam turin Stefano Pioli naute hian Roma hneh ngei an duh ang, an chak lo zui a nih chuan manager dinhmun thlengin a derthawng dawn.

Milan manager Pioli chuan, "Tunah hian kan tan season a la tawp vek lo. Serie A champion kan la ni thei a, chumi tur chuan theihtawp kan chhuah dawn, kan hna hmasa ber chu Roma hneh a ni," tiin chak ngei an tum thu a sawi.

Serie A hmahruaitu Inter Milan chuan zanin dar 1:15 hian league match khel turin Monza an lenchilh thung ang.