India-in Afghanistan an hneh

India leh Afghanistan ten January 11, Ningani aṭang khan T20 series an khel ṭan a, match thum khelh tura a hmasa berah Men in Blue wicket rukin an chak.

Punjab Cricket Association Stadium-a inkhelah India hian vawm hmasak an thlang. Afghanistan hian Mohammad Nabi (42) leh Azmatullah Omarzai (29) te hmangin over 20-ah 158/5 runs an siam.

India captain Rohit Sharma-a'n run siam lo mah se Shivam Dube-a'n ball 40-ah thi loin 60 runs a siam a, Shubman Gill (23) leh Tilak Varma (26) ten rawn belh bawkin over 17.3 lekah 159/4 runs siamin hnehna an chang.

January 14, Pathianni zan dar 7:00 hian Holkar Stadium, Madhya Pradesh-ah match hnihna an khel ang a; match tawp ber hi M. Chinnaswamy Stadium, Bengaluru-ah January 17, Nilainiah an khel leh ang.