Juve chakna Milik

Arkadiusz Milik-a hattrick hmangin Juventus chuan Frosinone 4-0 in an sawp a, harsa lo takin Italian Cup semifinal an lut, final thleng tur chuan Laizo an paltlang leh a ngai dawn.

Ningani zan Allianz Stadium-a inkhelah Juve tan Milik hian a khat tawkin goal a khung reng tiin a sawi theih a, second half-ah Kenan Yidiz chuan goal khat belh vein, mikhual lamin a chhan letna tur an nei lo.

Old Lady manager Massimiliano Allegri chuan, "Ka naute khan inkhel entu lamin an hmuh duh tur ang zawng zawng an chhawp chhuahsak niin ka hria. Tunah chuan league lam kan ngaihtuah leh rih tawh ang," a ti.

Juventus hma hian Fiorentina, Atalanta leh Lazio ten Coppa Italia semifinal hi an lo inhlangkai ve tawh bawk. Juve hian Serie A match khel turin Thawhlehni zanlaiah Sassuolo an lo mikhual leh ang.