Second round-ah Srikanth a tla

Malaysia Open Super 1000 badminton tournament khelh laiah Kidambi Srikanth chu second round paltlang zo loin a tla. Ningani tlai khan Hong Kong tlangval Ng Ka Long Angus lakah 13-21, 17-21 in a chak lo.

Mipa doubles lamah Satwiksairaj Rankireddy leh Chirag Shetty te erawh an la chak zel. Season hmasa lama nomawi paruk ngawt chawitute hian Lucas Corvee leh Ronan Labar ta ṭangdun chu 21-11, 21-18 in an hneh thung.

Hmichhe doubles lamah Ashwini Ponnappa leh Tanisha Crasto te pawh an che fuh, India nula te hian seeded pasarihna Wakana Nagahara leh Mayu Matsumoto te chu 21-19, 13-21, 21-15 a hnehin Paris Olympic an hnaih zel.