Australia lakah India an ṭang zo lo
AFC Asian Cup 2023-a an match hmasa berah India-in hun rei tak chhung Austalia chelh thei mah se, an ṭang tlang zo lo a, Inrinni zan khan champion beisei ngam team lakah hian 2-0 in an tlawm.
FIFA ranking-a 25-na ni phak Australia tan hian Jackson Irvine leh Jordan Bos te chuan second half-ah goal khat ve ve an khung a, Blue Tigers-in a chhanletna tur an neih loh avangin 2-0 in a chak lo zawkah an ṭang.
India chak zo lo mah se Mizo tan erawh zan chhinchhiah tlak a ni - Lallianzuala Chhangte leh Lalengmawia Ralte (Apuia) te chuan inkhel bul an ṭan ve ve a, defender Lalchungnunga chu bench lamah a awm thung.
Group B inkhel dangah Uzbekistan leh Syria chu 0-0 in an inhnehtawk a, India-in group mawngphah an luah. Blue Tigers hian January 18 zanah Uzbekistan nen an match hnihna an khel leh ang.
Beiseina bus!
Australia-in kum 2007 aṭang khan Asian Cup khel ṭanin, quarterfinal aia hniamah an tawp ngai lo. Kum 2015 phei chuan an champion a, 2011 final-ah an vanduai. India erawh 1964 daih tawha pahnihna an nih chu chhuan tur an neih chhun a ni a, FIFA ranking aṭang chauh loa teh pawhin team pahnih an inthlau.
Hei hi India coach Igor Stimac-a'n a hrechiang a, âtthlak taka Australia nawr ai chuan goal venhim hna thawh a, Lianzuala leh Manvir Singh tlan chakna hmanga counter-attack hmanga nawr let chu a ruahmanna a ni.
India hian inkhel ṭantir lamah Sunil Chhetri hmangin chance duhawm an nei hial a, mahse, India captain hian uiawm takin a tauh goal thei lo. India-in ball an chan chhunah an keng rei ngam lo a, ball inpek sual a tam bawk.
A tawi zawnga sawi chuan Chhetri-a'n chance a neih hnuah India-in chance hlauhawm tia sawi tur an nei tawh lo a, a bak zawng chu Australia ta a ni tawh - Blue Tigers tlarhnung an rim malh malh hle.
Australia nge nge
India tan a bik takin tlarhnungah Sandesh Jhingan a khel ṭha a, Nikhil Poojary lam hmaih a thiang lo bawk - midfield-ah Apuia leh a vawi khat nana India jersey ha Deepak Tangri inkawpin an hna an tlin a, rei tak chu India-in Australia an dan chah theih phah.
Mahse, a nawrtu zawk ni reng na na na chuan goal khung hun an nei. Minute 50-naah India keeper GSS a ngaih a sam hret a, awlsam taka ball man mai tur nia lang chu Jackson Irvine-a ke bulah a beng thla a, German second division club FC St. Pauli midfielder hian goal hmahruai ni turin a khung.
Australia an hawikir tawh lo - Middlesbrough attacking midfielder Riley McGree chuan ṭha zeta ball a lakluh hnuah Jordan Bos tan a siamsak a, Belgian Pro League club Westerlo defender hian goal ruakah a chhuih lut.
India coach Stimac-a'n goal an khung mial beiseiin substitution siam mah se, Blue Tigers tan si hnih phurh hnua Australia nawr a hautak hret a, hun tawp thlenga goal dang lut loin India an tlawm.
Beiseina
India forward Lianzuala chuan, "World Cup meuh pawh regular taka khel thei ram an ni a, khatianga rei kan chelh thei kha a lawmawm. Chutihrual chuan a uiawm duh takzet a, hmasawnna tur kan la ngah khawp mai," tiin Vanglaini a hrilh a, inzir belhna tur an ngah thu a sawi.
AIFF Player of the Year chuan team pahnih inthlauhna sawiin, "Keini aiin tawnhriat an nei ṭha a, an pumrua a ṭha a, tharum an ngah zawk. Heng hi chu thuhranah lo dah ta pawh ni ila, thutlukna siam kawngah kan phak lo a, an tihtur an chiang a, an khel ho rei tawh tih a hriat," a ti.
Asian Cup-ah group tina a sang pahnih chu last 16 lut chiang tur an ni a, group paruk aṭanga pathumna ti ṭha pali chu a thiam 16 zingah hian an tel bawk ang - Australia lakah chak lo mah se, India tan beiseina neih a thiang.
Lianzuala chuan, "Uzbekistan chelh kan tum ang a, Syria kan hneh theih bawk chuan last 16 luh beiseina kan nei. Kan match khelh leh turah tun aia ṭha zawka tih kan tum," tiin Vanglaini a hrilh a, beiseina a nei.
Stimac a lawm
India coach Stimac chuan, "Ka naute ka chhuang takzet - kan beisei ang apiang huaisen tak leh theihtawpa hlen tum mai ṭhin an nihna an pholang a ni. Zan mu mumal lo chung pawha beih hram hram an inpeih a, fak an phu a ni.
"Ka player-te hian national team tana khelh nuam an ti a, national team staff-te nena thawhho pawh nuam an ti," a ti a, a naute a fak. India captain Sunil Chhetri chuan, "Kan khelh dana kan lawm rualin result-a lawm erawh a harsa.
"Video kan en let hunah inrintawkna min pek belh ang a, siamṭhat kan mamawhna laiah kan insiamṭha thei bawk ang," a ti. India laka goal khungtu Jackson Irvine chuan India fakin, "First half-ah India-in an theihtawp an chhuah a, an theihna zawng zawng an hlan.
"Goal chhuah lo turin an taksa an hlan a, Asian top team dang ang maiin an khel a, an tihtur an chiang bawk. Khatiang ang team hmachhawn kha chu a hautak a, mahse, kan ti ṭhain ka hria," a ti a, India a fak hle.