Sinner tan hna a harsa lo

Tennis inelna lian Australian Open chu nimin zing aṭang khan an khel ṭan a, mipa singles champion tura rinkai zinga mi Jannik Sinner chuan a match hmasa berah Botic van de Zandschulp hnehin second round a inhlangkai.

Rod Laver Arena, Melbourne Park-a inkhelah kum 22 mi Sinners hian Dutch tlangval hi 6-4, 7-5, 6-3 in a hneh a, chak tur hian darkar hnih leh minute 34 chhung hun a hmang a, a service vawi khat chiah a hloh avangin a khel ṭha tih a nemnghet.

Italian tlangval Sinner chuan, "Tournament bul ṭanna ṭha tak a ni, set thum chhungin chak hman mah ila set li khel ang mai ka ni. Match lehpekah ṭha lehzual zawka khelh ka tum ang," a ti.

Sinner hian Grand Slam nomawi a la chawi chiah lo, a thiam zual pariat inelna ATP Finals an khelh zawh takah final a thleng thei a, an ram Italy chu kum 47 hnua a vawi khat nan Davis Cup a lakpui bawk, kuminah en bik hlawh tur zinga mi a ni.

Tun hma lama Australian Open semifinal lo khel tawh Matteo Berrettini erawh a ke ding lam hliam vangin a inhnukdawk, inelna ṭan hmaa a inhnuhdawh avangin a hmun ruakah Zizou Bergs a tel thung a, ani hian vawiinah Stefanos Tsitsipas a hmachhawn ang.

Mipa singles inkhel dangah 2018 pahnihna Marin Cilic a chak lo. Croatian tlangval hi Hungarian player Fabian Marozsan lakah 6-1, 2-6, 6-2, 7-5 in a chak lo. Marozsan hian second round-ah Dane Sweeny 3-6, 6-3, 6-4, 2-6, 6-2 a hnehtu Francisco Cerundolo a tum leh dawn a ni.