Luton goal khung danah Kompany a thinur

Turf Moor-ah Burnley-in anmahni ang bawka Premier League kaithar Luton Town an mikhual a, 1-1 in an inhnehtawk. Clarets hian Zeki Amdouni hmangin first half-ah hma an hruai a, injury time-ah Luton-in sawisel hlawh takin Carlton Morris hmangin an sut.

Injury time minute hnihnaah Alfie Doughty cross chu Morris-a'n a tauh lut a, substitute Morris-a'n a tauh luh theih nan hian forward Elijah Adebayo-a'n keeper James Trafford a dang. VAR hmanga ennawn a nih hnuah pawm a ni a, Burnley lamin an hrethiam lo hle.

Inkhelh banah Burnley manager Vincent Kompany chuan, "Ka naute bula thusawi tur pawh kha ka hre lo. Sawisel kher a ngai lo a, referee-in foul a ham nghal turah ka ngai. Thutlukna kha a nuihzatthlak a, a mak a, a mualphothlak bawk," tiin a lungawi lo hle. Luton-in an elpui Burnley laka point khat hlu tak an hlawhchhuah avangin Clarets aiin point liin an hmu sang chhunzawm zel.