Chelsea-in 10-na an chhuahsan

Premier League-ah Chelsea-in Inrinni zan khan Fulham 1-0 in an hneh a, 10-na aṭangin pariatnaah an invawrhchho. Blues hi a zawnin league-ah vawi thum an chak zawn tawh a, tun anga an khelh ṭhat chhoh chuan season thara Champions League khelhna kawng hi a la inhawng zau hle.

Stamford Bridge-a inkhelah hian Blues leh an mikhual Fulham te an inkhel tawk a, Conor Gallagher-a'n mualneitu tana a hun ṭha neih goal zawnah a pet thei lo. Cottagers tan Harry Wilson-a'n goal zawnah pet mah se keeper Dorđe Petrovic-a'n a dang.

Raheem Sterling-a'n first half injury time-ah a thiamna hmangin penalty a hlawh chhuak a, rawlthar duhawm Cole Palmer-a'n keeper bumin goal-ah a chantir. Second half-ah Chelsea-in goal hnihna an khung thei lo a, nuamsain an awm thei lo. Fulham striker Raúl Jiménez-a'n chance ṭha bik a hlah a, keeper Petrovic-a'n a hna a tlin bawk.

Blues-in goal chance an ngah zawk; Gallagher-a'n goal ban a pet per a, Noni Madueke pawhin goal zawnah pet mah se a pet ṭhat tawk loh avangin Bernd Leno-a tan dan a harsa lo. Chelsea-in an phu angin 1-0 in hnehna an chang a, thlasik chawlh nuam takin an hmang thei ang.