Bul ṭan fuh nghal Ivory Coast

Africa Cup of Nations 2023 match hmasa berah a thlengtu Ivory Coast chuan Guinea-Bissau chu 2-0 in an hneh a, minute lina leka Seko Fofana goal leh second half-a Jean-Philippe Krasso hmangin an chak.

Inrinni zan Group A inkhelah Elephants (Ivory Coast sawina) lamin bul an ṭan fuh hle a, goal kan hmuh hma bakah a khungtu Fofana bawkin chawlhlawk hmain a belhchhah teuh hle, a shot ṭha zet chu goalkeeper Ouparine Djoco-a'n goal bar a lo nem per hlauh.

Second half-ah erawh mipui puihna dawng ṭha Ivory Coast dan reng theih an ni lo, na taka an nawr rah sengtu Jean-Philippe Krasso chuan chak a nemnghet a, team nem zawk Guinea-Bissau lamin a chhan letna tur an nei lo.

Africa Cup of Nations hi nikuma khelh tur kha ni mah se, inelna neihna West Africa lama ruah sur hun avangin thla rukin a hun an sawn tlai a, a thlengtu ram Ivory Coast chuan an duh anga inbuatsaihna ṭha an neih theih phah bawk.

Ivory Coast hian hliam vangin an striker ṭha Sebastien Haller an chhawr thei lo a, an mamawh tawk goal erawh an khung tho. A vawi thum nan champion an tum dawn a, kum 1992 leh 2015 a nomawi an chawi tawh chhunzawm an tum dawn a ni.

Zanin dar 7:30 hian champion lai Senegal an inlan dawn. Egypt chuan kum 2010 khan a zawna a vawi thum nan Africa Cup of Nations nomawi hi an la a, a hnu lamah champion nomawi hum thei an la awm leh lo - Senegal hian Gambia lak aṭangin fiahna bul an ṭan dawn.

Sadio Mane, Nicolas Jackson, Serge Aurier leh Kalidou Koulibaly te an neih avangin Senegal hi team ṭha an ni tih a chiang a, kum 2008 hnu lamah Senegal hian Gambia hi an la hneh char char a, chuvangin zaninah pawh chak zawk tura rinkai an ni.