India nulate an chak lo

Indian Women’s Hockey Team chu FIH Hockey Olympic Qualifiers 2024 an match hmasa berah an chak lo. Inrinni zan khan India hi United States lakah 1-0 in an tlawm a, nizan khan New Zealand nen inkhel lehin result kan hre hman lo.

Inelna hi Paris Olympic qualifier a nih avangin a pawimawh. Ranchi, Jharkhand-a inkhelah India hi rinkai zawk an ni a, world number 6 hian inkhel an thununin goal vuak luh theihna remchang pawh an insiam hnem, mahse an chhawr ṭangkai thei lo vek.

USA hi world number 24-na daih an ni a, rinkai lo leh team nem zawk an ni. Mahse, minute 16-naah Abigail Tamer hmangin goal an khung hlauh a, a tawp thlenga an venhim theih miau avangin an chak zawk ta a ni.

India tan Lalremsiami Hmar a inlan a, Mizo nula hian khel ṭha pangngai viau mah se goal erawh a pai tel thei ta bik lo. Remsiami hi midfield-ah chhawr a ni a, tlarhma lam ami te tan ball a siamsak nual a, mahse an chhawr ṭangkai thei lo.

India hian nizana New Zealand an ngam lo zui a nih chuan an tan Paris Olympic ticket neih a harsa dawn, an hneh a nih erawh chuan kawng a inhawng zau thung ang.

Pool B-ah India hi USA, New Zealand leh Italy te nen an awmkhawm, an inkhelh kual vek hnuah a sang pahnihten semifinal an lut ang. Semifinal lut team te chu Pool A lama team pahnih nen an inel chhunzawm leh dawn a ni.

An pool match inkhel dangah New Zealand hian Italy chu 3-0 in an lo hneh thung. Frances Davies-i'n goal hnih a khung bakah Stephanie Dickins chuan goal khat a tilut a, bul an ṭan fuh avangin semifinal lut turin an dinhmun a ṭha rih hle.

Pool A lamah hian Germany, Japan, Chile leh Czech Republic te an awm thung. An match hmasaah Germany chuan Chile 3-0 in an hneh a, inkhel dangah Japan chuan Czech Republic 2-0 in an hneh thung.