La Liga pathumna Bilbao

Spanish La Liga kartawp inkhelah Spanish Super Cup khelh avangin team langsar Real Madrid, Barcelona leh Atletico Madrid an inlan lo a, inkhel ngaihven hlawhah Athletic Bilbao chuan 3-1 a Real Sociedad hnehin, table-ah pathumnaah an invawrh.

Bilbao tan Álex Berenguer chuan first half-ah goal hnih a khung a, Sociedad tana Mikel Oyarzabal goal khungin awmzia a nei phak lo - hun tawp thlengin goal dang a lut lo a, 2-1 in Bilbao an chak.

Hetihlai hian tun season-ah coach pathum zet an nei tawh chungin Sevilla-in an beisei ang result an nei hleithei lo a, Zirtawpni zan khan an mikhual Alaves lakah 3-2 in an tlawm - league match thum a zawnin an tlawm tawh!

December 18-a Diego Alonso thlaktu Quique Sánchez Flores-a'n Sevilla hi a enkawl hmasak berah Granada lakah 3-0 in a chakpui a, a hnuah league match thum kaihruai leh tawhin, an tlawm vek a ni.

Alaves hian Nahuel Tenaglia leh Enrique García hmangin, 2-0 in hma an hruai a, Sevilla-in Rafa Mir leh Lucas Ocampos (penalty) hmanga chhangletin, mahni muala khel an nih bawk avangin point an hlawh chhuak ngei dawn niin a lang.

Mahse, mikhual Alaves tan Rubén Duarte chuan minute 90-naah chakna goal a khung a, Sevilla hian point khat chiahin relegation zone an hlat - nizana inlan Cadiz-in hnehna an chan chuan Sevilla hi relegation zone-ah an awm ang.