Inter Milan leh Napoli an chak

Serie A champion tum Inter Milan an kang sang zel, striker ṭha Lautaro Martinez leh Hakan Calhanoglu ten goal hnih ve ve khungin an khingpui Monza 5-1 in an hneh - goal khat dang hi Marcus Thuram khung a ni thung.

Nerazzurri hi tun hnaiah duhthusama ṭhain an khel tawk lo, rin loh takin Genoa nen an inhnehtawk bakah Verona an hneh hram. Tunah erawh Juan Cuadrado inhliam mah se Federico Dimarco a lo kir leh thei tawh a, inkhel boruak pawh a danglam leh ta.

Inter Milan coach Simone Inzaghi chuan, "Season hmasa khan nomawi pahnih kan chawi bakah Champions League final kan lut a, fans lawmna kan siam. Tun season pawh min ṭantute hlimna thlen leh ngei kan tum.

"Tunah hian tluang takin kan kal a, league hmahruaitu pawh kan ni. Chutihrualin, kan team hi ka kaihhruai tawh Inter Milan team zinga a ṭha ber tiin ka sawi ngam rih lo, hmabak hlen tur kan la ngah hle. Monza laka kan khelh danah erawh ka lungawi," a ti.

Champion lai Napoli pawh an chak, an striker ṭha Victor Osimhen chu Africa Cup of Nations khelh vangin an chhawr thei lo a, a awm loh karah Matteo Politano leh Amir Reahmani ten goal khat ve ve an lo khung.

Table mawngphah luahtu, tun season kal laia vawi hnih chiah chak ni hmel la hmu Salernitana lamin Napoli lakah Antonio Candreva hmangin goal an nei hmasa a, mahse an goal neih an hum theih loh avangin point an hmu leh ta lo.