Champion lai Sabalenka a chak

Australian Open hmeichhe champion lai Aryna Sabalenka chuan a nomawi humhim ngei a tum a, a match hmasa berah Ella Seidel a hneh. German tleirawl, kum 18 mi lek hi minute 53 chhungin 6-0, 6-1 in a sawp.

Seeded pahnihna Sabalenka hian harsatna a tawk lo tiin a sawi theih, set hnih chhunga game khat chauh a hloh avangin a tir aṭanga a tawp thleng inkhel a thunun tihna a ni - a match lehpekah chuan Brenda Fruhvirtova a hmachhawn leh ang.

Kum 25 mi Sabalenka chuan, "Ka tan chuan Rod Laver Arena hi hmun hlu tak a ni a, ka bul ṭanna hmunah ngei hian a tawp thleng ka din leh theih ngei ka beisei a, chumi tur chuan ka bei dawn a ni," tiin nomawi humhim ngei a tum.

Inkhel dangah Coco Gauff chuan Anna Karolina Schmiedlova chu 6-3, 6-0 in a hneh. US Open champion lai Gauff chuan, "Tournament ka khelh dawna hlauhthawnna lian tak ka neih hi tun thlengin a la reh thei lo.

"Keimah leh keimah ka inhrilh mawlh mawlh a, hlau lo tur leh inringtawk turin ka infuih ru reng. Nuamti taka tennis khelh tawp mai hi ka duh dan a ni," a ti. Gauff hian amah ang bawka American player Caroline Dolehide a tum leh ang.

Inkhel dangah Wimbledon champion Marketa Vondrousova a chak lo. World number 7 Vondrousova hian Dayana Yastremska chu 6-1, 6-2 in a hneh lo a, tournament kal laiah hmeichhe player langsar zinga tla hmasa ber a ni.

Ukraine nula Yastremska chuan, "Tun hnai mai khan ka pi chenna in chu rocket hmanga kah a ni tih ka hria a, chu chuan kan rama thil thleng leh awmdan chiang takin a sawifiah, ka rilru pawh a luah hneh hle," tiin tennis ni loin an ram buaina chuan a rilru a luah nasat thu a sawi.

Elina Svitolina erawh a chak, seeded 19-na Svitolina hian minute 59 chhungin tualchhung player wildcard hmanga inlan Taylah Preston chu 6-2, 6-2 in a hneh.