Lukaku leh Martinez awmna Inter an hriam

Romelu Lukaku leh Lautaro Martinez te goal hnih ve ve bakah, defender Danilo D'Ambrosio goal khat hmangin Inter Milan chuan Thawhṭanni zan Europa League semifinal-ah Shakhtar Donetsk 5-0 in an sawp. 

Antonio Conte naute hian Europa League final an lut a, semifinal lehlama Manchester United pet chhuaktu Sevilla nen Zirtawpni zanah final an khel ang - Inter hian 2010-11 season hnua a vawi khat nan nomawi chawi leh an beisei.

Inkhelh ṭan hmain Antonio Conte-a'n Shakhtar Donetsk chu Europa League an khelh tawh china an hmachhawn tur ṭha ber an nih thu a sawi a, goal khung aiin a venhim lam a ngai pawimawh hmasa. Defender pathum thlawp turin a sirah wing back pahnih a hmang.

Team pahnih hi season tir lama Champions League khel phak, mahse group stage paltlang loh vanga Europa League khel chhunzawm an ni. Nerazzurri hi tlawm loin match 10 chhung an kaltluang a, Shakhtar erawh vawi 11 chak zawn thei an ni.

Quarterfinal-a hliam tuar Alexis Sanchez a dam leh tawh a, 100% a la nih loh avangin bench lamah dah a ni thung - a inlan lo tluan. Chhuak tura anga sawi midfielder Matias Vecino tan erawh hmun a awm lo. Hremna hmang zo defender Davit Khocholava hoin Ukrainian champion hi an inlan thung.

Esprint Arena-ah Inter Milan lam an fimkhur a, counter attack hmanga an khingpui beih let an tum tih a lang. Minute 19-naah midfielder Nicolo Barella chuan mual sir lamah zalen taka ball a chan hnuin a cross thut a, striker Martinez-a'n chiang zetin a tauh lut.

Chawlhlawk hmain goal dang kan hmu zui lo, second half-ah erawh Inter-in attacking game hmuhnawm an khel. Marcelo Brozovic-a corner pet chu defender Danilo D'Ambrosio-a'n a tauh lut leh a, goalkeeper Andriy Pyatov tan tih theih a awm lo.

Shakhtar lamin si phurh sut ṭhen theihna hun nei ve mah se Junior Moraes-a'n hnai tak aṭangin a tauh goal lo, keeper Samir Handanovic a tauh per. Inter bawk an hlauhawm zui, striker palian Lukaku ball pek dawngtu Martinez-a'n defender a tlan bum hnuah box pawn aṭangin goal kilah a khung, goal mawi a tling.

Argentina international hian goal hnih a neih hnuah Lukaku khung tur a siamsak ve thung a, hun tawp dawn hnaihah Belgium international Lukaku-a'n a tha chak na hmangin ball a lalut a, amah vengtu tlan pelin keeper Pyatov dan hman lohin an goal ngana a khung bawk.

Lukaku, Alexis Sanchez leh Ashley Young te hi Man United hnawl hnu an ni a, Chelsea duh loh Victor Moses leh Tottenham midfielder hlui Christian Eriksen te awmna Inter Milan-in Europa League final an lut.

Inter hian 2011 khan Club World Cup leh Coppa Italia an chawi, a hnu lamah nomawi chawi an nei tawh lo. Tunah chuan nomawi chawi turin match khat chauh chak an hmabak tawh - manager Conte-a'n nasa takin danglamna a thlen tih a chiang.

A bik takin Man United duh loh Lukaku-a'n striker ṭha bik a nihna a lantir zel a, Europa League match a khelh hnuhnung 10-ah goal 14 khungin a ṭhiante khung tur vawi li a siamsak tawh bawk; tunah chuan amah hnawltu United thlen phak loh final thlengin vanglai a hmang mek.

Inter hian Conte hnuaiah nasa takin hma an sawn tih chu a chiang a, chutihrualin nomawi tak erawh an la chawi bik lo. Final-a an hmachhawn tur Sevilla hi vawi nga champion tawh leh record nei ṭha ber an nih avangin hneh tur chuan thapui an thawh a ngai dawn.