Thih leh dam kara leng India

AFC Asian Cup-a an match hmasa berah India-in rei tak Australia chelh mah se, an ṭang tlang zo lo a, a tawpah 2-0 in an tlawm. Inkhelh zawhah India coach Igor Stimac chuan, "Kan tournament a inṭan ve ta," a ti a, Australia chu India tan hneh rualah a ngai lo a, Uzbekistan leh Syria laka chak erawh a beisei ngam tihna a ni.

Zanin dar 8:00-ah India hi an inlan dawn a, Uzbekistan nen an inkhel dawn. Blue Tigers tan round of 16 lut turin tlawm a thiang tawh lo a, an hmachhawn tur team an hrawl bawk si a, "Thih leh dam kara leng" tia sawi loh theih an ni lo.

India captain Sunil Chhetri chuan, "Uzbekistan hi Australia an ni lo," a ti a, an tan hneh theih an nih thu a sawi. Mahse, Chhetri a ṭawng fimkhur zui a, "Team ṭha tak erawh an ni a, kan tan chona hautak a ni dawn a ni," a ti.

Lallianzuala Chhangte chuan, "Ṭawngṭainaah min lo hre reng dawn nia," tiin beiseina a nei - India squad-ah hian Lianzuala bakah Lalengmawia Ralte (Apuia) leh Lalchungnunga te an awm bawk.

Uzbekistan an ṭha

Slovenian coach Srecko Katanec enkawl Uzbekistan hian hliam vangin striker chhuanvawr Eldor Shomurodov an chhawr thei lo a, Serie A club Cagliari striker awm lo hi India tlarhnung tan chuan chanchinṭha a ni.

FIFA ranking-a 68-na Uzbekistan hian match hmasa zawkah Syria hmachhawnin goal an khung thei lo a, India lakah chuan chak an tum dawn. Tlarhnungah Rubin Kazan defender Rustam Ashurmatov hoin an ding leh ang a, Sunil Chhetri leh Lianzuala te tan hmabak a ko dawn.

Turkish Süper Lig club Fatih Karagümrük midfielder Otabek Shukurov hi midfield-ah a hmuhnawm leh ang tih a chiang a, mual sir aṭanga goal nawr turin Super League Greece club Panserraikos winger Jaloliddin Masharipov a awm a, CSKA Moscow winger Abbosbek Fayzullaev chu Syria lakah bench-ah an la dah mah mah!

Asian Cup vawi sarih an khelh tawha vawi thum quarterfinal khel thei Uzbekistan hian group stage-a an zinkawng tihtawp mai an duh lo ang tih a chiang a, chumi tur erawh chuan India an hneh a ṭul - an hmabakah Australia an la awm tlat.

Mizo telna

India coach Stimac-a'n Lianzuala leh Apuia chungah rinna a nghah miau avangin Mizo player pahnih hi inkhel bul ṭan leh ngei tura beisei an ni a, Croatian coach hi Uzbekistan lakah pawh fimkhur taka a team remin, 4-2-3-1 a hmang leh tura ngaih a ni.

Australia laka chesual Gurpreet Singh Sandhu-a'n si ban a nghak leh ngei ang a, fimkhur a zir tawh tura ngaih a ni. Tlarhnung laiah Sandesh Jhingan leh Rahul Bheke inkawpin,right back-ah Nikhil Poojary awm tura ngaih a ni a, Subhasish Bose aiah Akash Mishra chu left back mawhphurhna chelh tura a luh a rinawm.

Stimac-a'n Australia lakah Deepak Tangri ring tawkin, ram tana a match hmasa ber a khelhtir a, Mohun Bagan midfielder hi Australia laka 96% passing accuracy nei thei Apuia nen inkawp tura ngaih an ni. Mual vei lam sirah Manvir Singh aiah Mahesh Singh a lut tawh tura ngaih a ni a, ding lamah Lianzuala a awm thei ang.

Tlarhmaah Sunil Chhetri a mal tlat leh ang a, kum 39 mi striker hi a kum tam deuh tawh mah se India tana beiseina kengtu langsar a la ni reng - Chhetri hnungah Suresh Singh aiah Brandon Fernandes lut se, Stimac tan thutlukna fing zawk a ni mai thei.

Beiseina neitu Lza

India forward Lianzuala chuan, "Theihtawp kan chhuah a, kan game dik tak kan khel chhuak ve tawh turah ngai ang. Australia kha team ṭha zawk an ni a, mahse, Uzbekistan hian an thlau lo khawp mai - technical lamah phei chuan an chungnung zawk em aw, ka ti hial.

"Kan tan dah hniam an thiang lo a, Australia ai mah khan kan ṭan a ngai dawn. Game tluana goal venhim theih kan tum ang a, chumi rual chuan kan chance neih angte chhawr ṭangkai kan tum ang," tiin Vanglaini a hrilh.

India hian Australia lakah bus an 'park' a, Gurpreet-a chetsual hma, rei tak chhung chu an chelh. Uzbekistan lakah pawh tlarhnung venhim hmasak chu India tan hna pawimawh a ni dawn a, counter-attack-ah Lza tlan chakna a ṭangkai ang.

Asian Cup-ah hian group tina a sang pahnih bakah, group paruk aṭanga pathumna tiṭha zual pali chu last 16 an lut dawn. A tawi zawnga sawi chuan point li pawh a thiam 16 zinga tel nan a tawk thei a, Blue Tigers tan zaninah fimkhur a finthlak ang.