India nulate tan Paris Olympic a hnai

Lalremsiami Hmar telna Indian Women’s Hockey Team chuan zanin dar 7:30 hian Germany an hmachhawn dawn. India hi an chak a nih chuan FIH Hockey Olympic Qualifier khelh laiah final an lut ang a, inelna lian Paris Olympic 2024 khel turin an tling nghal bawk ang.

Inkhel hi Sports18 leh Jio Cinema-ah a en theih dawn, mahni in lum aṭangin Mizo nulain Paris Olympic atana tlin ngei tuma German nulate a hmachhawn lai a lo en theih dawn tihna a ni.

Ranchi-a inelna neihah India hian an match hmasa berah an hneh ngei tura ngaih USA an hneh lo a, a hnuah New Zealand (3-1) leh Italy (5-1) a an hneh avang erawh chuan Pool B aṭangin semifinal an lut.

Pool A lam aṭangin Japan leh Germany an tlang thung a, anni pahnih hian semifinal an lut ve bawk. Final lut tlang pahnihte chuan Paris Olympic atan ticket an nei dawn a, semifinal paltlang loten pathumna zawngin a chak zawk chu an tling ve leh bawk ang.

Mizo zinga international umpire kan neih hmasak Lalremruati chuan, "India leh ram dangte inkhel kan en ṭhin a, beiseina pawh kan nei sang ve hle. Chutihrualin, Germany player-te hi an pumrua an lian a, hmachhawn an harsa dawn - hneh theih loh erawh an ni lo," tiin Vanglaini a hrilh.

FIH Hockey Olympic Qualifier khelh laiah India-in match vawi thum an khelh tawhah Remsiami a la inlan vek a, player pawimawh a ni vek - Mizo nula hi zaninah pawh a inkhel leh ang a, goal khungtu lam aiin a siamsaktu leh ball semtu lamah an hman leh a rinawm.

Kolasib nula Remsiami chuan, "Kan tum angin semifinal kan thleng ta phawt a, kan tum sang ber erawh a la ni lo. Tunah chuan Germany hneh tumin theihtawp kan chhuah dawn," tiin Vanglaini a hrilh a, ni dang ang bawkin Mizo mipuite ṭawngṭai puina a ngen nawn leh bawk.

Tun dinhmunah India nulate hi world number 6 an ni a, an khingpui tur Germany hi number 5 niin tun qualifier khel laia ranking sang ber an ni thung - team ṭha pahnih an nih avangin an inkhel hi a hmuhnawm dawn.