Conte a lungawi

Inter Milan manager Antonio Conte chuan a naute khelh danah a lungawi thu a sawi a, an sulhnu ropui a tih thu a sawi bawk. Italian manager chuan, "Ni tin mai hian ka naute an thawkrim em em a, a chhanna chu kan hmu ta, khelmual chhunga an chet dan kha lung a ti awi hle.

"Kum 10 zet a liam hnuah Inter chuan nomawi chawi theihna hun ṭha kan nei ve leh ta, tuna kan thlen chin pawh hi hriatreng a ni tawh ang," a ti. Conte hian Serie A title an inchuh laiin pahnihna nih chu atan awmzia a awm loh thu a sawi tawh a, tun ṭumah chuan pakhatna nih ngei a tum dawn.

Spanish club nen final an khelh tur thlir zui nghalin Conte chuan, "Kan khingpui tur Sevilla hi chuan tawnhriat an nei ṭha, final boruak tawng tawh player pawh an ngah hle. Ka naute zingah erawh Europa League vawi khat khelhna ni chauh te pawh an awm thung.

"Mahse kan zam dawn bik lo, rinna leh beiseina kan neih miau avangin hlawhtlinna chan theih ngei kan inring. Thawhrimna leh huaisenna nen kan fans duhzawng kan tih hlawhtlin theih ngei hi kan ring tlat a ni," tiin a sawi.