Match khatnaah Alcaraz a buai lo

Carlos Alcaraz-a'n kumin atana a match hmasa ber a khel a, inelna lian Australian Open a nih nghal avangin chetsual theih a ni. Mahse, world number 2 hi chesual loin a khingpui Richard Gasquet 7-6 (5), 6-1, 6-2 a hnehin second round a lut.

Alcaraz-a'n Melbourne Park a pan hmain inbuatsaihna tournament a khel lo. Nikum ATP Finals semifinal-a Novak Djokovic a hneh loh hnua a match hmasa ber a khel leh chauh tihna a ni a, Australian Open bikah 2022 hnua a hmasa ber a ni bawk.

Kum 20 mi Alcaraz chuan, "Ka beisei ang ngeiin ka khel ṭha, hmasawn ngaihna lai erawh a la tam. Set hmasa ber a harsa hret a, a hnu lamah erawh ka game pangngai ka khel chhunzawm thei," tiin a sawi, vawiinah Lorenzo Sonego nen an inkhel leh ang.

Inkhel dangah seeded pariatna Holger Rune chuan Yoshihito Nishioka lakah 6-2, 4-6, 7-6 (3), 6-4 in hnehna a chang a, seeded 11-na Casper Ruud pawhin awlsam angreng takin Albert Ramos-Vinolas chu 6-1, 6-3, 6-1 a hnehin first round a paltlang ve bawk.

Nimin khan Jannik Sinner chuan second round a lo khel der tawh a, a match hmasa ang bawkin set a hloh lo. Italian tlangval hian qualifying paltlanga inlan Jesper de Jong chu darkar khat leh minute 43 chhungin 6-2, 6-2, 6-2 in a hneh.

Seeded palina Sinner hi tun inelna neih laiah champion rinkai zinga mi a ni phak, season hmasa khan a vawi khat nan Toronto-ah masters title a la - a thiam zual pariat inelna ATP Finals-ah final a lut phak bawk a ni. Daniel Elahi Galan hnehtu Sebastian Baez nen an intum leh ang.