Bristol-in West Ham an barakhaih!

Championship club Bristol City chuan FA Cup aṭangin West Ham an pet chhuak a, Thawhlehni zan khan FA Cup third round replay-ah Premier League club hi 1-0 in an hneh - Tommy Conway chuan inkhela goal awmchhun hi a khung.

Thawhlehni zana Premier League club dang inlan zingah English top flight league club ve ve Wolverhampton Wanderers leh Brentford an intawng a, Wolves hian 3-2 in hnehna an chang.

Team pahnih hi hun pangngaiah 2-2 in an la inhnehtawk cheu a, extra time khelh a nih hnuah 3-2 in Wolves an chak. Brentford hian Nathan Collins leh Neal Maupay hmangin vawi hnih hma an hruai a, Nelson Semedo leh Nathan Fraser ten Wolves tana chhangletin, Matheus Cunha chuan penalty hmangin chakna goal a khung.

Hammers an tla

West Ham-in mahni mualah Bristol an hneh theih loh avangin replay an khelh a ṭul a, hliam vangin player pawimawh Jarrod Bowen leh Lucas Paqueta an inlan thei lo a, AFCON khel Mohammed Kudus a awm lo bawk a, khualmualah an tlawm.

Britsol tan Conway chuan minute thumna lekah goal hmahruai a khung a, Hammers-in a chhanletna tur an nei lo. Minute 51-naah West Ham forward Said Benrahma chu a chet dan mawi lo avangin hnawhchhuah a ni a, player 10 ni chunga khel Hammers tan a harsa zui.

West Ham boss David Moyes chuan, "Third round kan paltlang thei lo chu pawi ka ti hle. Cup inelnaa la tel zel hi kan duh a, mahse, March thlaah European football khelh tur kan la nei alawm. League-ah kan dinhmun a ṭha bawk a, chuvang chuan kan hnual lo tihna erawh a ni lo," a ti.

Wolves an chak

Minute 13-na lekah Wolves defender hlui Nathan Collins chuan Brentford tan goal khungin, a team hlui a hrem a, minute 36-naah Semedo chuan a sut. Goal dang lut loa chawlhlawk an hman hnuah Maupay chuan Brentford hma a hruai nawnpui a, mahse, Wolves hian Fraser hmangin an sut leh ngat.

Match hmasa zawka an inhnehtawk avanga replay match khel team pahnih hi replay-ah pawh an la inhnehtawk cheu a, extra time khelh a ni a, Brentford an vanduai ta zui. 105+5' minute-ah Wolves hian penalty an hmu a, Cunha chuan goal-ah a chantir.

Wolves coach Gary O'NeiL chuan, "Khelmual kan chhuahsan rual khan Premier League-a Brighton & Hove Albion nena kan inkhel tur hmabak ka thlir nghal," a ti a, fourth round-a West Brom nena an inkhel tur a la ngaihtuah loh thu a sawi.