Premier League-in Man City thubuai ngaihtuah hun an tichiang

Premier League chief executive Richard Masters chuan Manchester City-in financial rules bawhchhiaa an puhna thubuai ngaihtuah hun tur an tihchian thu a sawi.

Masters hian Premier League champion chungchang hi United Kingdom 'Member of Parliament' hmaah a sawi a, a hun tur erawh puanchhuah a la rem loh thu a sawi thung.

Man City ringawt hian thubuai an nei lo a, tun season-a point 10 ngawt an paihsak tawh Everton leh Nottingham Forest te pawh January 15, Thawhṭanni khan Premier League-a 'profit and sustainability rules' bawhchhiaa puh an ni bawk.

City hmalam a thim?

Man City hi February 2023 khan dan 100 chuang bawhchhiaa puh an ni a, an chungchang hi la ngaihtuah a ni lo. City thubuai hi kum kaw chhung a ni a, kum 2009 aṭanga inṭan tawh kha a ni.

Kum 2018 aṭangin City hi chhui chian an ni tawh a, anmahni chhuitute hi an thlawp ṭhat loh avangin thubuai dang pawh siamsak an ni.

Thuthang awm dan chuan kumin kumtawp hian City thubuai hi ngaihtuah ṭan tur a ni a, chutihrualin kum 2025 hma chu thutlukna a awm lo ang.

English club hi kum 2008-a Abu Dhabi United Group-in an lei hnuah Premier League mai ni loin khawvel football-ah an langsar. Premier League nomawi pasarih an chawi tawh a, Champions League leh FIFA Club World Cup nomawi kawl mektu an ni bawk.

Masters chuan, "Club eng pawh, champion lai pawh ni se pawisa hman dan zawm lo chu Everton emaw Nottingham Forest emaw dinhmun angah an awm thei ang.

"Chutihrualin Manchester City an puhna erawh tuna hremna kan lekkawh tawhte dang nen a inang lo a, thil awm dan tak erawh ka sawi a rem lo. An chungchang kan rel hun tur a la chiang thei lo a, hma erawh kan sawn zel," tiin a sawi.

Man City hian thiam loh an chang a nih chuan Premier League aṭanga relegate thei dinhmunah an ding a, champion nomawi an chawi tawh thlenga chhuhsak theih dan a awm.

Everton leh Forest

Point 10 ngawt an paihsak tawh Everton leh Nottingham te pawh Independent Commission-in kum thum chhunga an chet dan an chhui chian hnuah dan bawhchhiaa puh an ni a, April 8, 2024-ah an chungchang hi ngaihtuah a ni dawn.

Toffees-in hremna an tawh hi chu kum thum hmalam chiaha mi a ni a, tunah hremna thar an hmachhawn leh thei dawn. Masters chuan, "Dan hi kan ngai pawimawh hle. Club 20-in kan pawm tlan tawh a ni a, dan bawhchhe chungah chuan club tin thikthu a chhia. Everton hi Premier League-a team pawimawh tak an ni a, chutihrualin club dang 19 pawh kan ngaihtuah tel a ṭul," tiin a sawi.

Everton leh Nottingham chungchang an ngaihtuah hma hian Toffees-in hremna hmasa an khinletna ngaihtuah a ni phawt ang.