Jose Harry Mourinho Potter ni tura an beisei Mourinho chu

AS Roma chuan Europa Conference League nomawi chawipuitu leh nikuma Europa League final thlenpuitu Jose Mourinho an ban. Portuguese manager hian ban tawk zing ta viau mah se mi ṭhahnem tak mitah chuan 'the special one' a la ni reng.

Kum 60 mi Mourinho hian khelmuala beisei a phak tawk loh lai pawhin media hmaah chuan ṭawngkam mawi tak leh danglam tak hi a la chhep chhuak reng. Tun ṭuma an ban hma pawh hian Italian club-in 'Jose Harry Mourinho Potter' anga an beisei thu a sawi.

The Special One

Jose Mourinho-a'n FC Porto a enkawl laiin UEFA Cup a chawi zawhah Champions League nomawi a chawi chhunzawm a, Europe-a manager awhawm ber a ni nghal.

Roman Abramovich hnuaia indin thar Chelsea-in Mourinho hi an la chat. July 2, 2004-ah Mourinho hian Chelsea coach ni chungin a vawi khat nan press conference a hmachhawn a, hemi ṭum hian, "European champion kan ni a, 'the special one' ah ka inngai," tiin a sawi.

Portuguese manager hi a ṭawng huai ang chiahin khelmualah pawh a che ṭha. Blues hi Sir Alex Ferguson leh Arsene Wenger te vanglai khan Premier League-ah vawi hnih a champion pui a, FA Cup (1) leh League Cup (2) ah te a champion pui bawk.

Mourinho hian Inter Milan leh Real Madrid-ah te kalin league nomawi a chawipui ve ve a, Italian club phei chu a treble champion pui hial. Chelsea-ah kir lehin Premier League nomawi a chawipui leh tho a, London club aṭanga Manchester United a pan hnuah pawh nomawi a chawi.

Tottenham Hotspur-ah erawh Mourinho-a'n nomawi a chawi lo a, mah se League Cup final an khelh hmain an ban thung. Italy-ah kir lehin AS Roma a enkawl a, Italian club pawh hi Europa Conference League-ah a champion pui leh tho.

UEFA hnuaia inelna hrang hrang Champions League, UEFA Cup/Europa League leh Conference League thlengin a champion a; ram pali Portugal, England, Italy leh Spain-ah league champion a ni vek bawk. Mourinho hi 'The Special One' chu a ni ve chiang a ni.

Rome-ah Mourinho

May 2021 khan AS Roma-in Mourinho an la lut a, Rome khawpuiah lal ang maia lawm a ni. Roma-in Mourinho chungah beisei an nei sang a, an beisei ang erawh a pha chiah lo.

Mourinho hnuaia Serie A an hmachhawn hmasa berah parukna an ni a, Champions League khel pha china awm an phak lohna chu point sarih a ni. Mahse, Mourinho hote hian Conference League semifinal-ah Leicester City an hneh a, final-ah Feyenoord hnehin an champion.

Hemi ṭum hian Mourinho mittui a tla hial a, Portuguese coach, "Rome mi ang hialah ka inngai, mah se hei hi ka hnathawh dan phung a ni. Porto fan ka ni a, Chelsea fan ka ni a, Real Madrid ka atchilh a, Roma fan ka ni leh tawh. Min chhawrtute tan theihtawp ka chhuah ṭhin," tiin a sawi.

A ze ngai a chhuak

Conference League nomawi hi Mourinho hun inṭanna turah a ngaih theih a, mah se chu suangtuahna chu a thlawn mai a ni. Season hnihnaah pawh Roma hi Serie A-ah parukna tho an ni a, point 63 tho an hmu.

Khelmual chhunga result a ṭhat theih loh avangin khelmual sirah Mourinho a inhrosa nasa a, red card pawh ṭum thum ngawt a hmu. Europa League final an thlen avangin Champions League khelhna kawng a inhawng a, mah se final-ah Sevilla lakah penalty shootout hmangin an vanduai.

Season thumna an ṭan chhoh danah pawh Mourinho a lawm lo, Roma tan financial fairplay dan bawhchhiat a hlauhawm avangin player ṭha an senglut thei lo. Loan leh free transfer-ah an innghah a ṭul a, Romelu Lukaku erawh loan hmangin an la lut thung.

Chelsea leh Manchester United striker hlui Lukaku hian league bikah goal riat khungin club top scorer ni mah se result erawh a tiṭha pha lo. Roma hian match 20-ah point 29 hmuin pakuanaah an awm.

Mourinho hian Chelsea, Real Madrid, Manchester United leh Tottenham a enkawl laia a tih ṭhin angin result ṭhat loh hnuah a inhrosa chho leh a, tun season-ah pawh red card ṭum thum a hmu leh tawh.

Referee lakah ringawt Mourinho hi a inhrosa lo, media hmaah pawh a khawsa ngeiawm hle. Roma-in Sassuolo 2-1 a an hneh zawhah Mourinho hian Italian a thiam reng chungin Portuguese a hmang a, ṭawng lettu a dah. Hemi hnua Atalanta nen an inkhelh ṭuma red card a hmuh ṭum phei chuan media mite a hmachhawn duh lo.

Mourinho hian player-te chungah pawh a thinurna a hri thla fo tawh ṭhin a, Roma-a tuartu chu Renato Sanches a ni. Thla liam taa Roma-in Bologna 2-0 a an hneh loh ṭumin minute 18-na lekah Sanches hi a la chhuak.

Harry Potter chu...

Mourinho hian club neitu, referee leh player-te lakah a lungawi lohna a lantir a, Roma ṭantute pawh a zuah chuang lo. Italian Cup-a Lazio an hneh loh ṭumin fans ṭhenkhat an lungawi lo a, Mourinho hian an beisei sang mah maha a ngaih thu a sawi chhuak.

Porutuguese coach Mourinho chuan, "Roma ṭantute hi ka hmuh tawhah chuan an la danglam ber. An coach hi Jose 'Harry Potter' Mourinho a nih avangin beiseina pawh an nei sang zel," tiin fan-te a tiel.

Harry Potter hi khawvel huapa lekhabu ziaktu JK Rowling-i phochhuaktu a ni. Dawithiam naupang chanchin a ni a, Mourinho hian Roma fan-te chuan dawithiam ang maia amah chu an ngaih thu a sawi. A tawi zawng chuan Portuguese manager hian Roma ṭantute hi a tiel a ni ber.

Eng pawh chu ni se, 'The Special One' tia inchhal ngam ngat Mourinho-a'n a chet ṭhat vang ni loa fan-te tihel nana Harry Potter nena a inkhaikhin hian a hun a liam ve ṭan tih a tilang. Mourinho hian a vawi ruk nan ban a tawk a, a nungchang leh ze danglam tak avang hian Europe-a club lianin an la ngam ang em, tih hi zawhna lian tak chu a ni. Sum ṭhahnem tak pe theitu tur Saudi Arabia lam a pan a nih pawhin thil mak a ni lo ang.