Mumbai-in I League champion Punjab an hneh

Thawhlehni zan khan Mumbai City chuan 3-2 in Punjab FC an hneh a, Indian Super Cup khelh mekah match hnih khelin an chak ve ve tawh - Mumbai hian match hmasa zawkah Gokulam Kerala chu 2-1 in an lo hneh tawh a ni.

I League club Punjab FC tan Luka Majcen a langsar a, goal hnih a khung - mahse, a goal hmahruai khung chu Mumbai tan Ayush Chhikara chuan a sut a, kum 21 mi forward hian minute second half-ah belhchhah lehin, 2-1 a ni der.

Punjab tan Luka Majcen chuan minute 87-naah si phurh a sut ve leh a, point an insem mai dawn niin a lang hman. Mahse, team langsar zawk Mumbai-in chak loh an duh lo a, hun pek belhah Seilenthang Lotjem chuan chakna goal a khung - hun tawp thlengin goal dang a lut tawh lo a, 3-2 in Mumbai an chak.

Mumbai tan Hmingthanmawia (Valpuia) chuan inkhel bul a ṭan a, Punjab lamah Brandon VL Remdika chuan inkhel bul a ṭan ve bawk.

Nimin khan Super Cup inkhel dangah FC Goa chuan 1-0 in Bengaluru an hneh a, semifinal lut turin an dinhmun an sawhnghet - hun pek belhah rawlthar Brison Fernandes chuan inkhela goal awmchhun a khung a, Goan club an chak.

Super Cup-ah hian team 16-in inelna hmachhawnin, group paliah team pali zel awma ṭhen hran an ni a, group tina a sang ber ṭheuhin semifinal an lut dawn - Khalid Jamil enkawl Jamshedpur FC chu semifinal lut chiang tawh team an ni.