Ivory Coast hmaah Nigeria

Africa Cup of Nations 2023 thlengtu Ivory Coast chuan zanin dar 10:30 hian Nigeria an hmachhawn dawn, tun tournament khelh laiah chuan ram pahnih inkhel tur hi boruak lian leh ngaihven hlawh berte zinga mi a ni ang.

Ivory Coast hian an match hmasa lamah Guinea-Bissau chu 2-0 in an hneh a, zanin hian Olympic Stadium of Ebimpe-ah hnehna hlado an chham leh a nih chuan knockout stage an lut nghal tluk a ni tawh dawn, chak an duh dawn tih a chiang hle.

Nigeria erawh Equatorial Guinea nen 1-1 in an inhnehtawk a, striker ṭha Victor Osimhen hmangin si phurh an sut hram zawk a ni, zaninah an tlawm leh a nih chuan group stage paltlang a harsa dawn, chak loh a rem lo tihna a ni.

Jean-Louis Gasset-a enkawl Ivory Coast hian tun hnai an match hnuhnung pasarihah tlawm an nei lo, an khelh ṭhat tluan lai a nih avangin inrintawkna an nei sang, tun ṭumah hian an rama khel an nih avangin khelmual pawn lam aṭanga puitu an nei ṭha bawk.

AFCON bikah chuan Nigeria hi dah hniam an remchang bik lo, kum 1982 hnu lamah group stage paltlang loh an la nei ngai lo. Team ṭha Ivory Coast hneh tur erawh chuan Napoli champion pui theitu Osimhen lakah mawhphurhna a sang zual ngei ang.

Zanin dar 1:30 hian Mohamed Salah awmna Egypt chuan Ghana an hmachhawn ve dawn bawk. Salah te hian an match hmasa lamah point khat an hmu a, an tan tlang turin chetsual nawn loh a pawimawh ve bawk dawn a ni.

Thawhlehni zan khan Group E ten an match hmasa ber an khel a, Namibia chuan hun tawp dawna Deon Hotto-a goal khat hmangin Tunisia 1-0 in an hneh - Africa Cup of Nations vawi riat an khelh tawhah a vawi khat nan hnehna an chang.

Tunisia erawh AFCON 2004 champion thei an ni a, world ranking lamah pawh Namibia aiin 87 ngawtin an sang zawk - mahse mi tam takin an sawi fo angin football-ah chuan thil thleng thei lo tak tak hi a awm lo tih fiahtu an ni.

Group E inkhel dangah Mali chuan South Africa 2-0 in an hneh a, point thum hmu ram pahnihah Namibia aiia goal difference an neih ṭhat zawk avangin group hmahruaitu an ni mek.