VAR puihna nen Saudi an chak hram

Tun hnaia football-a sum an hman nasat avangin Saudi Arabia-in ngaihven an hlawh a, mahse, Asian Cup-a an match hmasa berah hnehna chang turin vanneihna an mamawh - Oman chu 2-1 in an hneh a, video assistant referee puihna an mamawh thung.

Oman hian Salaah Al Yahyaei-a penalty hmangin goal hmahruai an khung a, Saudi hian hun tawp nan minute 12 chauh a awm tawh tihah Abdulrahman Ghareeb hmangin si phurh an sut hram.

Vanneihnain Saudi a um zui a, hun pek belhah Ali Al-Bulayhi hmangin chakna goal an khung zui - a tirah offside vangin pawm a ni lo a, VAR rawn a nih hnuah goal-ah pawm a ni a, Saudi an chak.

Thawhlehni zan Asian Cup group F inkhel dangah Thailand chuan 2-0 in Kyrgyzstan an hneh a, forward ṭhangduang Supachai Chaided chuan goal hnih a khung - group F-ah Saudi leh Thailand ten point thum ve ve an nei mek.

Barakhaih

Khalifa International Stadium-ah mipui 40,000 chuang inkhel en turin an pungkhawm a, Saudo-in game hmuhnawm phochhuah an inbeisei. Mahse, minute 14-naah Oman lam hian goal hmahruai an khung - Saudi lam corner pet chhiat zar zoin Oman hian na takin an nawr let a, Saudi defender Hassan Al-Tambakti chuan Muhsen Al Ghassani a titlu.

VAR rawn a nih hnuah penalty pet a ni a, Qatar SC midfielder Salaah Al-Yahyaei chuan harsatna nei loin goal-ah a chantir a, Saudi an hawihai. Oman lamin an tihtur an hrechiang a, goal venhim hna an thawh zui avangin Saudi tan a harsa.

Mahse, minute 78-naah Saudi tan vanneihna a her chhuak ve ta nge nge. Al Nassr winger Abdulrahman Ghareeb chuan Oman defender pali a bum hnuah ṭha zetin si phurh sutna goal a khung a, Roberto Mancini enkawl Saudi an phur sawt.

Goal dang a lut lo reng a, Saudi an vannei nawn. Hun pek belh minute ruknaah Al-Bulayhi chuan chakna goal a khung - assistant referee-in flag a phar avangin mipui thawm ring tak a reh duk a, mahse, VAR rawn a nih hnuah goal hi pawm niin, Saudi an chak.

Hei le Thailand

Asian Cup 2019-ah khan Thailand-in an match hmasa berah friendly match pawh an khelhpui duh loh India chu 4-1 ngawtin an ngam lo a, coach Milovan Rajevac chu a hna aṭangin an chawlhtir nghal.

Mahse, Asian Cup 2023-ah chuan thawnthu a danglam ta a, Thailand-in an match hmasa berah Kyrgyzstan chu 2-0 in an hneh - Supachai Chaided chuan goal hnih a khung a, Kyrgyzstan lamin a chhanletna tur an nei lo.

Kum 25 mi Chaided hian minute 26-naah goal hmahruai khungin, minute 48-naah a belhchhah bawk - Chaided hi an ram club lar Buiram United tana khel lai niin, season hmasa khan Thai League 1-ah top scorer leh most valuable player a ni kawp thei.

Japanese coach Masatada Ishii enkawl team hi an chhe lo hrim hrim. Tlarhmaa player hmuhnawm Suphanat Mueanta kha kum 21 mi lek niin, Belgian Pro League club OH Leuven tan a khel mek a, right back Nicholas Mickelson kha Danish Superliga club Odense Boldklub tan a khel mek bawk.