Kane hian Lewy a khum thei ang - Tuchel

Bayern Munich coach Thomas Tuchel chuan a striker Harry Kane a dahsang hle a, German football season khat chhunga goal khung hnem ber Robert Lewandowski (41 goals) meuh pawh a khum theih a ring.

England captain hian nipui bazar lai khan Tottenham Hotspur aṭangin Bayern Munich hi a zawm. Bavarians tan Bundesliga bikah goal 22 a khung tawh a, inelna hrang hrangah tun season chhungin goal 26 a khung tawh.

Tuchel chuan, "Robert Lewandowski-a record siam kha khum thei an awm a nih a, hlauhthawnawmah a awm a nih chuan tun hi chumi hun chu a ni ang, record kha khum theih loh a ni lo.

"Chutihrualin, Harry hi hliam loa a awm reng a ngai a, chumai bakah a ṭhiante puihna ṭha a mamawh tel bawk. Ṭha taka a khel zel thei a nih chuan eng nge lo thleng kan hria ang," a ti.

Poland international striker Lewy-a khan kum 2021 May thla khan Bayern legend Gerd Mueller-a record a lo khum tawh a, kum 39 hnuah record a siam a ni - Kane tan khum leh theih a ni a, kawng erawh a la thui dawn hle.

Kane chungchang sawi zuiin Tuchel chuan, "Kane hi pa inngaitlawm tak mai a ni a, ni tin mai hian training-na hmun thleng hmasa a ni ṭhin, a lak aṭanga i beisei thil i sawi a nih chuan a chhanna a hmuhtir nghal zel mai ang che.

"Amah chauh ni loin a bula khel dangte chu player ṭha zawkah a siam, theihna a neih san miau avangin a tan tih theih loh a awm lo," tiin Spurs tana goal khung hnem ber Kane a dahsang thiam hle.

Kane hian nomawi chawi duh vangin Spurs a chhuahsan a, champion theihna tura ngaih Bayern Munich a zawm. Bavarians tan khel ṭha viau mah se Bundesliga table-ah Bayern Leverkusen chu point liin an phak lo mek, match khatin an khel tlem thung.