A mi ngaihsan hnehtu Mirra Andreeva

Australian Open khelh laiah beisei loh result kan hmu zauh zauh, chung zingah chuan kum 16 mi chauh Mirra Andreeva-i'n a ngaihsan tak mai leh champion rinkai zinga mi Ons Jabeur a hneh kha a tel ngei ang.

Season hmasa mai kha chuan Andreeva hian Australian Open hi junior huangah a la khel, kuminah erawh seeded parukna Jabeur chu minute 54 chhung lekin 6-0, 6-2 a hnehin second round a lut.

Russian tleirawl Andreeva chuan, "Ons Jabeur hi ka player ngaihsan, a inkhel pawh ka en nasat zinga mi a ni a, a khelh dan phung hi ka duhzawng a ni. Kan inkhel thei ringawt pawh kha ka tan chuan a hlu lutuk, hnehna chan leh ngat phei chu duhthusam thleng dik a ni," a ti.

World number 1 hlui Caroline Wozniacki pawh a chak lo, season khat chhunga Grand Slam hmasa ber first round-ah Wozniacki hian kum 20 mi Maria Timofeeva chu 1-6, 6-4, 6-1 in a hneh lo, fa pahnih neih hnua inkhelh leh chu thil awlsam a ni ta lo.

First round inkhel dangah Emma Raducanu chuan hnehna a chang. British tleirawl hian Shelby Rogers chu 6-3, 6-2 a hnehin second round a lut a, season hmasa khan kerek leh banrek hliam vangin buai deuh mah se tunah chuan a dam chiang ta.

US Open champion Coco Gauff erawh a chak. American tleirawl hian Caroline Dolehide lakah 7-6 (7-2), 6-2 a hnehna changin third round a inhlangkai thung.