Wolff-a tan contract thar

Toto Wolff chuan kum thum daih contract a ziak thar a, Formula 1 team hlun Mercedes tan Team Principal leh Chief Executive a ni chhunzawm zel dawn tihna a ni.

Austrian mi Wolff hian Mercedes-ah hian hmun thuma ṭhena hmun khat chu neitu nihna a nei a, a thawhpui INEOS leh Mercedes-Benz te nen an inbiak hnuah contract thar hi a ziak.

Kum 2013 aṭang khan Wolff hian Mercedes hi a luhchilh zual a, kum 2014 aṭanga kum 2021 chhung khan a zawnin season riat ngawt mai chu team champion a lo nihpui tawh.

Kum 52 mi Wolff chuan, "A pawimawh ber chu hnehna chan a ni a, chumi tur chuan kei leh ka thawhpui ten theihtawp kan chhuah chhunzawm ang. Kei aia hna thawk ṭha thei zawk an awm hma chuan chawlh mai ka tum lo," tiin Mercedes tihmasawn zel turin a la inringtawk hle.

Tun hnaiah Red Bull an che ṭha ṭhin a, season thum chhung chu team leh driver championship lam an awp hneh hle. Season hmasa pawh khan Red Bull hnungah Mercedes hi an awm a ni.

Car intlansiakna sang ber hi season chawlh an hmang mek. Ruahman dan chuan tun season lo awm turah hian intlansiak 24 a awm dawn, a hmasa ber atan March thlatir hian Bahrain Grand Prix an tlan ang.