Juve chakna Vlahovic-a goal mawi

Dusan Vlahovic-a goal mawi pahnih bakah hun tawp dawna Federico Chiesa khung hmangin Juventus chuan Sassuolo 3-0 in an hneh a, an chunga awm Inter Milan an phak lohna chu point hnih chauh a ni ta - Serie A nomawi inchuh boruak a nung chho zel dawn.

Thawhlehni zan Allianz Stadium-a inkhelah, kum 23 mi Vlahovic chuan box pawn aṭangin mawi zetin a thlawh lut a, Sassuolo goalkeeper Andrea Consigli tan dan ngaihna a awm lo; Serbian striker hian an goal hnihna chu freekick aṭangin mawi takin a khung bawk.

Hun tawp dawnah Chiesa chuan Manuel Locatelli siamsak a khung a, an chak a nemnghet. Italy international Chiesa hian hliam na tak a neih avangin rei tak a inkhel thei lo, a lo kir leh hnuah ngai awh leh mai lo mah se tun hnaiah a khel ṭha thei leh tawh hle.

Goal hnih khungtu Vlahovic chuan, "Match tin mai hi a hnuhnung ber tur angin kan chhut a, chumi tur ang chuan kan inbuatsaih ṭhin, chu chuan rah ṭha a chhuah ni ngeiah ka ngai. Goal ka khung bakah ka khelhpui leh ṭhian ni bawk Federico ka lawmpui," a ti.

Old Lady hian Pathianni zanah Lecce an hmachhawn dawn a, an chak a nih chuan Serie A hmahruaitu an ni lailawk ang. An elpui Inter Milan chuan kartawp hian Riyadh lamah Italian Super Cup an khel thung ang.