Chaltlang Ryders hun a liam ta

Nilaini zan khan Mizoram Super League season 2 relegation playoff chu Hawla Indoor Stadium, Republic Vengthlangah khelh zawh a ni. Zarkawt BCA chuan 64-51 a Chaltlang Ryders hnehin MSL khelh chhunzawm zel turin beiseina an la nei. Ryders erawh season tharah chuan an hmel kan hmu tawh dawn lo tih a chiang thung.

March 21, Thawhṭan zan khan playoff game 1 khelh a lo ni tawh a, BCA-in 63-58 in hnehna an lo chang tawh bawk. Game thum khelh tura ruahman ni mah se match hmasa pahnihah hnehna an chan avangin an tlang chiang. Division 1 pahnihna Republic VR4 nen MSL3 khelh inchuh turin April 26, 28 leh 29-ah playoff an la khel leh dawn a ni.

Playoff game 2 inkhelah BCA tan Michel F. Lalawmpuia, Matthew Remtluanga Sailo, Zorinsanga leh Jackson Lal-rin-tluanga te an khel ṭha a, anni pali hian point 41 zet an thawhkhawm. Ryders lamin player an hmang hnem lo a, Lalremtluanga, Lal-bel-tluanga, Lalduhawma, L.P Lalhmingliana, K. Lalbiakzuala, K Lalchhuanawma, Samuel Malsawmkima leh Lalthangliana te chiah an inlan tir. Player pariatte hian huaisen takin theihtawp chhuah mah se an an chak zo lo.

Ryders an uiawm

Mizoram Basketball Asso-ciation (MBBA) hnuaia team hlun leh nung ber pawl Ryders hi kum 1997 khan mipa leh hmeichhe team din a ni a, kum 2001 thleng khan tluang takin kal mah se a dintute zirna vanga an awm darh vangin tihtawp lailawk a ni.

Kum 2013 khan Ryders hi din thar leh niin veng hrang hrang aṭanga player lakhawmin Third Division aṭangin bul an ṭan leh a, an champion nghal nghe nghe. November 2014-ah Second Division-ah an champion leh bawk.

Second Division an champion zarah Mizoram Super League season hmasa ber khel turin an tling nghal a, mahse tawn hriat an la ngah loh avangin beisei an phak lo. MSL2-ah pawh state pawn player Rachit leh Vishal Kumar Gupta te la lutin beiseina sang tak nen inlan mah se an inham tang zo ta chuang lo.

MSL2 ṭan hmain Ryders hian guard Lalmuanpuia Zote chu Tuikual South lakah an chan, Ramhlun North tlangval hian season hmasa match 10 a khelh aṭanga point 219 zet score-in ani aia score hnem an awm lo. Mapuia awm loh hi an tuar tih a hmuh theih.

Chaltlang Ryders coach K. Lalbiakzuala chuan, "Season hmasa nena thlir chuan kumin chu kawng engkimah hmasawnna a awm a, team zawng zawng an ṭha zawk tih a lang. Kan tlak chhanah chhuanlam leh mawhpuh tur an awm hran lo a, kan ṭhat tawk loh vang a ni. Kan club kal zel dan tur hi tunah chuan sawi chian theih a la ni lo a, board meeting thutlukna a ni ang," tiin an club kal zel dan tur a chian rih loh thu Vanglaini palai a hrilh.

Ryders a ui thu sawiin Zarkawt BCA coach R. Liansangpuia chuan, "Ryders hi tualchhung basketball ti hlutute zinga mi an ni a, MSL-a an hmel kan hmu tawh rih lo tur hi ka ui hle. Kuminah phei chuan beiseina sang tak nen sum an seng hnem a, hetiang dinhmun an tawng hi ka tawrhpui hle. Beidawng lo se, MSL-ah lo kir leh ngei turin duhsakna ka hlan," a ti.

BCA nge nge

MSL1 finalist Zarkawt BCA hian tun season a league match vawi nga an khelhah vawi khat chiah chak ni hmel hmuin Ryders chiah hi an hneh. Relegation playoff-ah erawh a zawnin hnehna an chang thei thung.

BCA hian MSL2 semifinal lut zo lo mah se an chhe ta duai tihna a ni hran lo a, Ma-rova Memorial Basketball Tour-nament champion lai an ni. Coach Sangpuia'n player leh club thuneitute lam an hnual loh thu a sawi avangin he team hi an tlu hlen lo ang tih a chiang.

Dinthar tlangval Sangpuia chuan, "Kan player-te an hnual phah lo a, kan inkhelh tawhnate thlirkirin kan chak lohna lai kan insiam ṭha ang. Hun harsa kan tawh lai pawha min phatsan ngailotu fan-te tan team ṭha zawk nen kan lo kir leh ang," tiin Vanglaini palai a hrilh.