Valencia-ah Gary Neville tan hmun a awm lo
Manchester United leh England defender hlui Gary Neville chuan Valencia-ah thla li em pawh a hman hmain a hna aṭangin ban a ni a, Spanish club hi a enkawl chhunzawm tawh dawn lo.
Kum 41-a upa manager hian nikum December thla khan Valencia hi a enkawl
ṭan a, league match 16-a khelh puiah vawi thum chiah hnehna chanpuiin inelna hrang hranga match 28 an khelhah vawi 10 chiah a team hi hnehna a chanpui thei.
Neville chuan Spanish club-ah chuan cham chhunzawm zel duh mah se an result chu a theihna ngaihtuahin a chhe lutuk nia a ngaih thu a sawi a, club beiseina a phak lo chu hrehawm a tih thu a sawi bawk.
English defender rorum
ṭhin chuan ban a ni chu a hriat-thiam thu a sawi a, 'result hmanga kan hna hi thlithlai
ṭhin a ni' tiin Valencia hotute thutlukna a pawm thu a sawi. Neville ban ni mah se assistant manager a nau Phil Neville erawh Spanish club-ah hian a cham chhunzawm zel ang.
Neville hi Copa del Rey semi-final first-leg a Barcelona 7-0 laia an hneh loh ṭumin bang tura nawr a lo ni tawh a, international break a nih hmaa Celta Vigo laka 2-0 a a team a tlawmpui chu Valencia a kaihhruai hnuhnung ber a ni ta.
England assistant manager ni bawk Gery Neville-a hmun ruak hi Liverpool assistant manager hlui Pako Ayestaran chuan a luah rih dawn. Neville hian February khan Spanish manager hi amah pui turin a la lut a, ka chhuah pawhin a chhuak ve zel ang ti mah se Ayestaran hian English manager hnung zui zel aiin Valencia enkawl a thlang zawk.
Valencia-a Neville
Valencia manager tura coaching lama tawnhriat ngah lo Gary Neville ruat a nih khan mi tam tak mak tih a hlawh a, Valencia neitu Peter Lim nen non-league club Salford City-a neitu nihna an neih ho vanga ruat niah mi tam tak chuan an ngai.
Northern Premier League Premier Division-a inlan mek club-ah hian Peter Lim hian neitu nihna 50% a nei a, Phil Neville, Gary Neville, Nicky Butt, Paul Scholes leh Ryan Giggs-te'n neitu nihna 10%
ṭheuh an nei bawk.
Neville hian a match hmasa berah Champions League match khelin Lyon a mikhual a, hnehna a chan pui zo lo. League match-a a chak result hmasa ber chu February 13-ah a hlawh chhuak ve chauh a, Copa del rey leh Europa League lamah vawi sarih lai hnehna chang lo phei se Neville hian tun ai hian a daih rei lo zawk ang.
Eng nge an sawi?
European football expert Andy Brassell chuan, "Neville hian thil thlak danglam turin hun a ngah tawk lo. Tawnhriat a ngah loh vang emaw Valencia beiseina a san vang emawa beisei phak lo a ni lo a, club kaihhruai a nih danah fan-te an lungawi lo sa a, player-te an buai a, tawnhriat ngah lo manager tan chuan a nasa mah mah a ni," tiin Neville-a tan Valencia siamṭhat a harsat thu a sawi.
Spanish football journalist Graham Hunter chuan, "Nevilla-a'n a tihsual chu Peter Lim-a'n hun a pek a inring hi a ni, ka ngaihdan chuan tun hnaia mi thar zingah coach emaw, analyst emaw Neville anga ṭha British football aṭangin an awm lo. Hliam na tak tuar mek club a chhuahsan a, Spanish ṭawng nal taka a hman theih nan hun pek nise chuan Valencia hi a khai chhuak em em ang," tiin Neville-a buaina chu ṭawng a nih thu a sawi chhuak.
Real Madrid leh Wales forward Gareth Bale chuan, "Spain hi chu a danglam a, manager ni tur lehnghala he rama lokal ngat hi chu a harsa lehzual a ni. Mahse, Neville hi ropui takin a lo kir leh ang tih ka ring tlat a ni," a ti.
Neville hma hian Manchester United manager hlui David Moyes chu Spanish club Real Sociedad-ah a hlawhchham tawh a, Bobby Robson-a'n hlawhtling taka Barcelona a enkawl hnuah British manager Spain ramah an hlawhtling tawh lo.
Neville-a Ṭawngkam
Valencia a enkawl ṭan aṭanga Neville-a thusawi ṭhenkhat;
"Valencia hi club lian leh ropui tak a ni a, player ka nih lai aṭang tawhin he club fan-te inpekna leh rilru hi ka hria a ni" (Decmber 2, Valencia a enkawl tirha a sawi)
"TV pundit-ah ka ṭhu rei tawk tawh a, ka tan din chhuah a hun tawh. He club min sawmna hi hnar ni ila chuan ka inrintawkna ka hloh tihna a ni dawn" (December 3, news conference hmasa ber)
"Ka dinhmun min zawt a, zawhna ṭul lo a ni. In thil tih tum hi fan-te tihtir tum suh u" (January 31, fan-te'n an auh el hnua press mite hnena a sawi)
"Zanin chu ka mu hleithei dawn lo a ni. Hei hi football-a ka tawnhriat duhawm lo ber chu a ni" (February 3, Barcelona 7-0 a an hneh loh ṭuma a thusawi)
"He hmun ka lo pan khan thla nga chhungin ka hnathawh an thlir tur thu ka sawi a, mah se a kar ruknaah ka hnathawh thlir nghal a ni" (Real Betis laka 1-0 a an tlawm ṭuma a sawi)
"Mawhphurhna ka la a, fan-te hnenah ngaihdam ka dil a ni. Derby-ah chuan khatianga khel tur kan ni lo a, in sawiselna zawng zawng hi kan pawm a ni" (March 13, League table mawngphah Levante laka an tlawm ṭuma a sawi)