Barca an inṭhuahfai ṭan A tuar hmasa ber Setien

La Liga nomawi an hloh a, Champions League-ah an mualpho bawk. Barcelona-in rang takin inṭhuahfai hna an ṭan nghal a, a tuar hmasa bertu chu coach Quique Setien a ni. 

Thawhṭanni tlai lam khan Barcelona board of directors chu an ṭhukhawm a, Setien ban thu hi an tichiang. Catalan club thuneitute hi an inhmuhkhawm hmain Setien ban turin an thu a inhmu sa tawh niin a lang a, official-a puan a nih hma hian Setien ban a ni dawn tih hi a chiang tawh. 

Barcelona chuan rei loteah coach thar an puan tur thu an sawi bawk a, hei pawh official takin la puangzar kher lo mah se  Ronald Koeman a ni dawn tih a chiang tawh - he thu ziak i chhiar meuh chuan an puang tawh hial mai thei bawk. 

La Liga club chuan, "Team pumpui insingsa tura kan thutlukna hmasa a ni," tiin Setien an ban thu an puan rualin an sawi a, Barca hian player pawh an chhuahtir nual dawn niin a lang. 

Barcelona-in  Ernesto Valverde hnuaiah a zawnin league nomawi an chawi a, January 13-a Spanish coach an ban khan La Liga-ah hmahruaitu an ni a, Champions League group stage-ah Borussia Dortmund leh Inter Milan an awmpui chungin hmahruaitu an ni bawk. 

Hei mai a ni lo - Valverde ban a nih lai hian November 2 hnuah league-ah a tlawm leh tawh miah lo a, champion-na kawng a inhawng zau hle. Mahse, Barca-in Valverde hnuaiah an duh ang game an hmu lo niin an hria a, an ban tho. 

European top club la enkawl ngai lo Setien chungah rinna nghatin 'risk' an la a, zawhna tam tak a awm - Barca enkawl chak coach ṭha tak tak an awm ngei ang a, anni karah eng vangin nge Setien hi lak a nih? Spanish division hniam lama club a enkawl lai chuan 'Barcelona of lower division' tiin a club-te chanchin an sawi ṭhin a, Barcelona legend Johan Cruyff-a football kalphung 'Cruyffian football' ngainatu a ni bawk. 

Barca-in Setien hmanga hlawhtlin theih an inbeisei a, kum hnih leh a chanve chhung atan contract an ziahpui - mahse, kum chanve chiah a cham hman tihin Setien ban a ni a, Barca hi match 25 bak a kaihruai hman lo!

Catalan club hian La Liga nomawi an hloh khan Setien hi an la ngaidam a, Champions League an ngaichang leh phawt - football game mawi hmanga Napoli an paltlang hnuah Bayern Munich lakah 8-2 in an mualpho. 

April 1946 hnua a vawi khat nan Barcelona-in goal riat an chhuah a, club thuneituten an dawh reng thei ta lo. Setien ban a ni a, an tana lo khel tawh leh club hrechiangtu Koeman-a'n a thlak dawn. 

Hriat tel tur erawh Setien ringawt hi dem theih a ni lo - kum 61 mi coach hi mahni thu duh leh mahni duh dan ngata kal ṭhin coach a nih avangin hriat a hlawh a, buaina pawh a tawk fo. Barca-ah erawh a duh dan 100% hi a tlang lo ang tih chu thil chiang a ni a, fan-ten board of directors lam inṭhuahfai pawh an duh ang. 

Barcelona hian nakkumah President thar an nei dawn a, inthlan hun hi a tirah chuan June atan ruat a ni. Mahse, Thawhṭanni tlaia thuneitu ṭhukhawm chuan inthlan hun hi March 15-ah an sawn a, Barca fans an hlim khawp ang. 

Sumdawng hausa Victor Font chuan Barca President hi a chuh tur thu a sawi chiang tawh a, ani hian club legend Xavi chu hmachhuanah neiin Al Sadd SC coach ni mek hi Catalan club-ah a hruai kir tur thu a sawi. Kum 2003-2010 inkara Barca President lo ni tawh Joan Laporta chuan Catalan club hruai hna hi a chuh leh tur thu a sawi ve bawk a, ani hian Pep Guardiola hruai kir chu hmachhuanah a nei.

Laporta hi Barca senior team enkawl tura Pep ringtu kha a ni a, Xavi, Carles Puyol, Víctor Valdés leh Andrés Iniesta te chher liantu a ni bawk. Barca President hna a chelh chhungin nomawi 12 an chawi hman - club vice president ni mek Emili Rousaud chu chuh ve tura ngaih a ni bawk. 

Barca-in coach atan Koeman an lalut a, Spanish football expert Guillem Balague chuan Dutch coach hian kum hnih chhung atan contract a ziah tur thu a sawi a, "Barca enkawl a châk avangin kum khat contract pawh pe se, a lawm tho ang," a ti!

Tottenham manager hlui Mauricio Pochettino pawh  Barca hmelma Espanyol player leh manager hlui a nih avangin fans tam takin an duh loh rin ni mah se Barca hian an dawr tho a, mahse Poch lakluh erawh sum vangin an zuam lo niin a lang. 

Chiang taka lang chu Barca hian Poch-a hlawh tur zat an ngam lo a, Koeman hi man tlawm zawka a lo awm avangin an lalut ta a ni ber - an duh ber coach an lalut lo tihna a ni. Barca hian lei ba euro maktaduai 700 vel an nei mek a, an club sum lakluh 70% hi chu first team player-te hlawhah an seng ral. Koeman-a hna hmasa ber tur chu a duh ang player hriat a ni a, a mamawh loh, kum upa, hlawh hnem si player chhuahtir a, La Masia lam a hawi a ṭul ang.