Ka dinhmun a la chiang lo - Payet

Dimitri Payet chuan Euro 2016 khel tur France tan player koh zingah a tel dawn leh dawn loh a la chian loh thu leh coach Didier Deschamps thuthlukna a nih thu a sawi.

West Ham midfielder Payet hian Thawhlehni khan a kum 29 tlin cham chu goal nen a lawm a, Russia nen friendly match khelin bench aṭanga rawn tlan lutin ball a khawih hmasak ber atan freekick a pet a, goal-ah a chantir zui nghe nghe.

France international hian nipui lai khan Ligue 1 club Marseille aṭangin pound maktaduai 10.7-in West Ham a zawm a, Upton Park-ah hian beisei baka che ṭhain match 23 a khelh aṭangin goal riat a khung der tawh a, a club thar hi season thara Champions Leaue khel thei dinhmunah a awmpui mek.

Ram tana match 17 khel ve tawh Payet chuan, "Team tan ka theihna zawng zawng ka hmang ṭhin a, ka thawkrimin ṭangkaina pakhat tal neih ziah ka tum ṭhin. Ka khelh ṭhat tluan lai a nih ve avangin Euro-a inlan ve theih pawh ka beisei a, mahse thuthlukna siamtu tur chu coach a ni thung," tiin a sawi.