Hmasawn kan ngai - Dani Alves

Dani Alves-a'n 2018 FIFA World Cup khel turin Brazil chuan hmasawn nasat an ngai hlea a hriat thu a sawi.

Brazil hian beisei angin World Cup qualifying an khel ṭha lo a, Uruguay an inhnehtawkpui zawh hnu chiah an match hnuhnung berah Paraguay lakah si hnih an phurh zet hnuah hun tawp dawnah an sut zo thei hram. Match ruk khelh tawh aṭangin point kua chauh la hmuin table-ah parukna dinhmun an luah mek.

South American Football Confederation (CONMEBOL)-a ram 10 te khu vawi hnih ṭheuh an inkhelh kual hnuah a sang pali chu World Cup khel turin an tling chiang nghal a, pangana chuan inter-confederation playoff an khelh a ngai ṭhin. Tun dinhmunah chuan Brazil awmna hi a duhawm lo hle.

Barcelona defender chuan, "Hmasawn kan ngai, kan khingpuite hmunawl kan siamsak hnem ṭhin lutuk hi kan insiamṭhat a ngai a ni. Kan result a ṭhat loh vanga mawhpuh tur bik chuang an awm lo a, a pawimawh ber chu kan taksa mai bakah rilru put hmang kan siamṭhat a, hmalam kan pan a ṭulin a hun tawh," tiin a sawi.

Kum 32-a upa Alves hian Brazil tan match 89 a lo khel ve tawh a, club lamah chuan Bahia leh Sevilla tan te pawh lo khel tawhin tuna a khelh mekna Barca tan hian match 240 a khel tling tawh bawk.