Euro khel lo tur - Elliot

Republic of Ireland goalkeeper Rob Elliot chu a khup hliam vangin Euro 2016-ah a hmel kan hmu thei dawn lo a, a chawlh hun chhung tur erawh sawi chian a la ni lo thung. Newcastle goalkeeper Elliot hian Thawhlehni zana Slovakia nen 2-2 a an inhnehtawk ṭumin hliam a tuar a ni.

Kum 29-a upa Elliot chuan, "Tun season chhung chu Magpies tan ka inlan thei tawh dawn lo a, Enro-ah pawh Ireland tan ka inkhel ve thei dawn lo," tiin thu lungchhiatthlak tak a sawi.

Republic of Ireland hi Euro 2016-ah Sweden, Belgium leh Italy te nen group E-ah an awm khawm a, an match hmasa ber chu June 13 khian Saint-Denis, Paris-ah Sweden nen an khel ang.

Elliot inhliam thu hi Ireland tan chauh chanchin ṭha lo a ni bik lo ang. A club khelh mekna Newcastle hi Premier League table mawng lamah an talbuai mek. Nikum October thla khan an keeper Tim Krul chu khup na vang bawkin tun season chhung khel thei lo turin an lo chan tawh bawk a ni.