Zanin NorthEast Derby-ah Relegation Battle
I League champion Mohun Bagan hnehtu Aizawl FC-in zanin dar 7:00 hian Shillong Lajong nen North East Derby an khel dawn. MPL champion hi pangana ni mah se table mawngphaha awm Lajong nen an inthlauhna hi point khat lek a ni a, inkhel pawimawh tak hi 'relegation battle' hming vuah atana mawi a ni.
Mala & Jahar
Aizawl FC-in Spanish coach Manuel Retamero thlaka coaching staff-a K. Malsawmkima leh Jahar Das an lakluh hnuah an khelhpui hmasa ber chu Shillong Lajong an ni. Mualpuia North East Derby hmasa berah goal a lut lo a, inkhel nung a ni lo.
Hemi hnu hian Aizawl FC-in RG Stadium-ah Mumbai FC hneh mah se khualmuala Bengaluru hneh loh leh Mumbai FC draw in a chhunzawm nghal a, Mizorama an rawn let lehna hmasa berah East Bengal an inlehthaltir bawk avangin MPL champion hi tla tura ngaih an ni hman.
Amaherawhchu tunah erawh Aizawl FC hi I League champion Mohun Bagan hnehtu an ni a, an phur vanglai tak a nih avangin Shillong-ah point thum hlawhchhuah an tum.
Aizawl FC manager K. Mal-sawmkima chuan, "Kan training hmasa berah kha chuan tlemin kan rit deuh chuan kan hria a, amaherawhchu team chhung boruak a ṭhat bakah player-te an dam ṭhat avangin ngaihtuah awm kan ni lo. Shillong Lajong lakah hian point thum hlawhchhuah kan tum," tiin Vanglaini palai a hrilh.
Mariners an hneh ṭuma in-hliam Immanuel HS Lalṭhazuala aiah Lalramchullova a lut ang a, starting eleven dang erawh I League-a Aizawl FC kaiputu coach Mala hian thlak an tum loh thu a sawi. Aizawl FC hian Ni-lai-niah Sporting Goa an hma-chhawn dawn a, March 11-ah Salgaocar an hmachhawn leh-nghal dawn avangin player an siksawi thiam chhoh erawh a ṭul ang.
Chak harsat Lajong
Shillong Lajong-in January 31-a Sporting Goa an hneh hnuah vawi sarih zet khel leh tawh mah se chak result an nei tawh lo a, an match hnuhnung pahnihah Bengaluru leh Salgaocar hma-chhawnin an chak lo ve ve bawk.
Lajong boss Thangboi Singto chuan Aizawl FC lakah point thum hmuh ngei a tum a, amaherawchu tun hnaia an result en mai chuan awlsam takin point thum an hlawh chhuak lo ang.
Mizo Vs Mizo
I League-a man of the match vawi li ni tawh David Lalrinmuana'n Aizawl FC a ho dawn a, MPL champion tan starting eleven-ah Mizo pariat an awm turah a ngaih theih.
Shillong Lajong hian Mizo paruk Lalrammuana, Zodingliana Tochhawng, Joseph Lalfakzuala, Jacob Lalrawngbawla, Isaac Vanmalsawma leh Samuel Lalmuanpuia te an kawl a, Lajong tan hian Mizo pathumin bul an ṭan a rinawm.
Aizawl FC hian hun rei lote chhung chu Mizo hlang-in an khel zeuh tawh a, amaherawhchu team tan Yuta Kinowaki, Joel Sunday leh Alfred Kemah Jaryan te an pawimawh avangin Mizo hlanga khelh hi thil ṭul ber a ni lo.
Chutihrualin khelmual chhunga hun rei tak Mizo player 11 zet an awm thei a nih chuan chanchin chhinchhiah tlak tak a ni ang.
Lajong tan hian Salgaocar an hneh loh ṭuma bul ṭan Adinga leh Samuel te'n starting eleven an chan nawn a rinawm a, bench aṭanga khelh ṭhat rah sengin Hnahthial tlangval Isaac-a'n inkhel bul a ṭan a rinawm bawk.
Aizawl FC ang thoin La-jong foreigner pali Yusuke Yamagata, Uilliams, Fabio leh Fábio Pena te an che ṭha vek lo a, Japanese defender Yamagata hian first eleven a chang kher lo ang. Chutihrualin Brazilian forward Uilliams ai hian Mizo rawlthar Samuel-a'n hmun a chan a rinawm bawk.
Midfield laiah erawh Ni-ge-rian midfielder Penn Orji chu rinrawl a ni dawn a, goal-keeper Vishal Kaith nen an la khel kim vek. Hetihlai hian Aizawl FC-in keeper an thlak kual reng a, match hnuhnung berah Lalawmpuia chu a vawi khat nan a inlan a, Aizawl Venglai tlangval hi ṭum hnih vel chefuh lo mah se chet-
ṭhat ṭum a ngah viau thung.
Mizo Ṭawiawmna
Shillong hi Mizo tamna hmun a ni a, Aizawl FC-in ṭawi-awmna ṭha an hmu dawn. Shillong-a Mizo awmten I League inkhel en turin an inbuatsaih a, Lajong hian field an hriatchianna bak chu JN Stadium-ah mualneitu nihna an nei tam bik lo ang.
MPL champion hian khualmualah ṭawiawmtu an hmu ṭha thei a, Bengaluru FC an hmachhawn ṭum phei chuan Mualpuia inkhel entu aiin Sree Kanteerava Stadium-a Mizo inkhel entu thawm a ṭha zawk.