Kolkata Derby ticket hralh zo

Mohun Bagan leh East Bengal ten Inrinni tlai dar 4:00 hian Kanchenjunga Stadium, Siliguri-ah I League match pawimawh tak an khel dawn a, ticket 25,000 zet chu hralh zawh nghal a ni.

Nilaini khan ticket hi hralh niin zing dar 6:00 aṭangin ticket lei tumin football ngainatu ṭhahnem tak an intlar tawh. Siliguri hi East Ben-gal ṭantu tamna hmun a ni a, tun thla hian West Bengal Assembly election neih a nih dawn bawk avangin Trinamool Congress ticket-a seat chuh ve tur India captain hlui Baichung Bhutia chuan Red and Gold Brigade jersey nen inkhel a en dawn niin sawi a ni.

Mariners leh East Bengal te hi an inkhelh hmasak zawkin 1-1 in an inhnehtawk. Tunah hian Red and Gold Brigade hian Bagan hi point ngain la pha lo mah se match khata an khelh tlem avangin S. Malsawmtluanga (Mama) leh Robert Lalthlamuana te khelhna club hian Jeje Lalpekhlua khelhna club hi an la hlat lo a, inkhel pawimawh a ni.

Kolkata Derby hi champion zawnna pawh ni lo se ticket sing chuang hi chu an hralh zo chiang. April 11, Thawhṭannia Aizawl FC leh Salgoacar inkhel tur hi him leh dam inkar a ni dawn a, inkhel pawimawh ni chung siin tun thlengin ticket zawrh chhuah a la ni lo - ticket an hralh zo ve ang em tih zawhna chhanna hi hriat a châkawm hle.