Berdych lakah Djokovic a chungnung

Novak Djokovic chuan Tomas Berdych lakah a chungnun zia a lantir leh ta. World number 1 hian Ningani zing khan Crandon Park-ah darkar khat leh minute 40 chhungin Berdych 6-3, 6-3 in a hneh a, Miami Open semifinal a inhlangkai.

Serbian tlangval Djokovic hian tun hnaiah seeded pasarihna Berdych hi a zawnin vawi 10 a hneh tawh a, an intawn tawhna zawng zawngah vawi 23 hneh tawhin ṭum hnih chu a chak lo zawkah a ṭang thung.

Seeded pakhatna Djokovic hi set hnihna an khelh laiin a hnung zâng na vangin enkawl a ngai a, mahse hliam na a nih loh avangin a inkhelah buaina a neih phah lem lo. Semifinal-ah David Goffin a hmachhawn leh dawn a ni.

Kum 28-a upa Djokovic hian Miami Open title hi vawi nga a chawi tawh a, kuminah hian a champion leh a nih chuan a zawna vawi thum hlawhtlinna a channa tur chiah a ni ang.

Inkhel dangah David Goffin chuan world number 18 Gilles Simon lakah 3-6, 6-2, 6-1 in hnehna a lo chang ve bawk a, Belgian player zingah Goffin hi Miami Open semifinal inhlangkai thei hmasa ber a ni nghe nghe.