Zaninah Semifinal Game 2 Khatla nge tam dawn Zarkawt?
MVP nilai H. Laldinsanga chuan, "Kan inkhel aṭang khan a chiang vek alawm, semifinal kan la lut chiang lo," tiin Zarkawt Serpents chu semifinal game 2-ah an hneh chian loh thu game 1 khelh zawhah Vanglaini palai a hrilh. Khatla TBL-in SYS aṭanga coach atana an lak Mapuia thusawi hi a dik a nih chuan semifinal game 2 hi a hmuhnawm ang.
Zanin dar 8:00 hian Serpents leh TBL te an intawng leh dawn a, Zarkawt leh Khatla mipui Hawla Indoor Stadium-ah an fuan khawm ang.
Final thlir ngam
Vanglainiin semifinal game 1 a report danin Zarkawt Serpents chak loh chhan chu Khatla TBL aia chak châkna an neih tlem zawk vang a ni a, semifinal-ah an lungawi tawkah a ngai.
Serpents manager Dino Laldin-puia Chhangte chuan, "Chak châk loa min lo ngai a nih chuan kan thiam loh a ni. Player-te pawh ṭha takin kan infuih a, final thlen kan duh tih hi thu chauh ni loin game chhungah kan rawn lantir ang," tiin huaisen zawka an khelh tur thu Vanglaini palai a hrilh.
MSL2-a kan hmuh TBL aiin MSL1 champion TBL kha an ṭha zawk niin a lang a, Khatla champion ṭuma hneh thei awmchhun chu Serpents hi an ni. Hemi belhchhah tur hian Aizawl veng langsar Zarkawt tan Khatla ngam loh nghal ringawt hi a dik lo a, veng pumpuia thawhchhuah hun a ni. Marova Memorial Basketball-ah Zarkawt veng mipui an thawkchhuak a, Zarkawt club pakhat zawk BCA-in Khatla TBL an hneh.
Serpents hi an coach Arvinder Singh leh center Sahil Sharma ten telpui tawh lo mah se game 1-ah an ṭha tawk tih a lang. Zarkawt tlangval Lalsangkima a hmuhnawm ṭhin a, Serpents guard hi an veng club final hruai thleng thei turin a ṭha tawk.
Captain Hmingthanmawia, Jonathan Vanlalhriatpuia, Lal-ramropuia (LR-a Jr) leh R. Lalruattluanga (LR-a Sr) te chu offence lama team chakna thahrui an ni a, defence lamah Hmingsanga Chhakchhuak a thawhhlawk
ṭhin hle bawk. A tawpah erawh senior player an pawimawh ṭhin a, Serpents hian Lianhmingmawia uapna an mamawh.
Vanglaini palaiin Mapuia
ṭum hnih a zawnin a che chhe ngai lo tia a zawhna chu Serpents manager Dino chuan, "Defence khawng ṭha tak neih leh kan tum a, Mapuia pawh player ṭha tak ni mah se ven hneh leh ngei kan tum. Turnover kan ngah kha kan chak lohna chhan a ni a, kan insiamṭha tawh ang," a ti.
Rinkai TBL
Khatla TBL-in Mission Veng Vikings an hneh loh hnu-ah India player Vishesh Bhriguvanshi leh Pratham Singh bakah City Police zawm thar Gospel Lalthawmmawia leh R. Lalmalsawma te hoin awl-sam takin Zarkawt BCA leh Tuikual South an hneh.
Player ṭha pali tel loin TBL hian semifinal hmasa berah hnehna an chang leh nghal a, amaherawhchu Serpents 71-66 a an hneh ṭum hian an chak chiang lo. Khatla TBL tan Vanlalmuana leh Eddie Zothanmawia te an khel ṭha a, hun tawp lama team chhandamtu chu captain Vanlalnunsanga (Lana) a ni.
Zanin hian TBL-in hnehna chan nawn an duh a nih chuan an thiampuipa Mapuia a lansarh a
ṭul a, mipui an pawimawh bawk. Game 1-ah TBL-in Serpents hneh mah se court pawnah Khatla-in Zarkawt an tluk lo. MSL1-a
ṭantu nei ṭha ber Khatla TBL hian MSL2-a mipui lamah tluk loh an ngah a, Game 2-ah an la kim dawn chuan loh avangin rinkai ni zawk mah se chak lo thei an ni.