Goal 500 khung tlin chak Messi

Lionel Messi hian Inrinni zana El Clasico an khelh hunah goal a khung a nih chuan a career-a goal 500-na a ni dawn a, Barcelona thiampuipa hian mel lung pawimawh phun a chak thu a sawi.

Kum 28-a upa Messi hian Thawhlehni zan khan World Cup qualifying-a Argentina-in Bolivia 2-0 a an hneh ṭumin penalty a chhuih lut a, an ram tan goal 50 khung tling chiahin senior career-a a goal khung zat chu 499 teh meuh a ni ta!

Ballon d'Or winner chawimawina vawi nga lo dawng tawh Messi hian an hmelma leh elpui Real Madrid lakah mel lung pawimawh bik phunna hun ṭha a nei dawn a, chhawr ṭangkai theih a chak hi a mak hran lo.

Khawvela inkhel ngaihven hlawh berte zinga mi El Clasico thlirin Messi chuan, "Goal ka khung thei a nih chuan a lawmawm ang. Hnehna kan changa kan hmahruaina kan sawh nghet thei a nih chuan a lawmawm dan a zual ngei ang," tiin point thum hlawh-chhuah a duh thu a sawi.

Tun dinhmunah Bar-celona hian league match 30 an khelh tawh aṭangin point 76 an hmu tawh a, pahnihna Altetico Madrid aiin point kuain an sang fal mek. Pathumna Real Madrid chuan point 10 zetin an phak lo tawh a ni.