Guardiola tan England a awlsam lo ang - Sir Alex

Manchester United boss Sir Alex Ferguson chuan season thar aṭanga Manchester City enkawl tur Bayern Munich manager Pep Guardiola tan English football chu a awlsam loh tur thu a sawi.

Khawvela manager hlawhtling ber pawl Sir Alex chuan, "Manchester City hian Pep nei turin theihtawp an chhuah tih ka hria a, mah se Bayern manager tan hian a hna a awlsam dawn lo. Engtiklai mahin English football hi a awlsam ngai lo. Ka thusawi hi Arsene Wenger leh Jose Mourinho-te pawhin min pawmpui a ni," tiin Spanish manager chu awlsam taka hlawhtling nghal turin a ring lo.

Premier League-a vawi 13 lai United cham--pion pui theitu manager chuan sawi chhunzawmin, "Pep hi a hlawhtling ngei ang tih chu ka ring a, mah se awlsam takin a ni lo ang. Barcelona-a a hlawhtlinna ang phei kha chu a chan theih ka ring lo a, khatih lai Barcelona kha chu khawvela ṭha ber an ni," tiin City leh Barca chu khaikhin chiah a ruat lo.

Sir Alex chuan Guardiola chu rim taka hnathawk ṭhin a nih thu sawiin, "Pep-a'n hna a thawh rim ṭhin zia chu inzawhbuai a ngai lo. Player tupawh thawkrim peih lo chu Pep-a hnuaiah hian an daih rei lo ang," tiin Barca manager hlui hnuaia khel tur chuan thawhrim a ngaih thu a sawi chhuak.

United manager ropui ber chuan Guar-diola-a'n league nomawi a chawi leh chawi loh chu club lian dangah a innghah thu sawiin, "A pawimawh ber chu club lian dangin eng nge an tih dawn? tih hi a ni. Chelsea leh Jose an lokal khan bul an ṭan ṭha em em a, kha chona kha ka hmachhawn a ni. Chutiang chiahin Pep lokal huna club lian Arsenal leh Liverpool lo inbuatsaih danah league nomawi chawi tur chu a hriat chauh ang," tiin Premier League chu a hautak thu a sawi.