NBA playoff Inkhel a hmuhnawm nghal, Jazz aia vannei Nuggets

Conference pahnih aṭanga a ṭha zual pariat inelna NBA playoff khelh ṭan a ni a, a thiam zual hlir an nih tawh avangin a hmuhnawm nghal. Game 1 inkhelah Denver Nuggets, Los Angeles Clippers, Boston Celtics leh Toronto Raptors ten hnehna an chang nghal.

Pathianni zan inkhelah Denver Nuggets leh Utah Jazz an inkhel tawk viau a, overtime an khelh hnuah Nuggets lamin 135-125 a hnehina changin game 1 an la a, best of seven series khelh turah 1-0 in hma an hruai. Nuggets tan hian Jamal Murray-a'n point 36 a nei, a point neih zinga 10 hi overtime chhunga a hlawh chhuah niin an chak theih nana mi pawimawh a ni. Ani bakah hian point 29 a lak bakah rebounds vawi 10 latu Nikola Jokic a khel ṭha hle bawk.

Jazz lam tan Joe Ingles (19 points), Jordan Clarkson (18) leh Rudy Gobert (17) te an khel ṭha thawkhat viau a, an mahmawh zat point erawh an nei thei lo. Chhungkaw thil vanga guard Mike Conley inlan thei lo an tuar deuh tih a lang. Nilaini zan dar 1:30-ah team pahnihte hian game 2 an khelh leh dawn, tlang tur chuan a tlem berah pawh game 4 tal hnehna chan phawt a ngai dawn a ni.

Los Angeles Clippers chuan Dallas Mavericks 118-110 in an hneh. Clippers tan hian Kawhi Leonard chu player hmuhnawm leh langsar ber a ni. Leonard hian point 29, rebounds 12 leh assist vawi ruk a nei bawk a, ani aia thawh hlawk an awm lo.

Third quarter tir lamah Mavericks zawkin point ngain hma an hruai fal thei, mahse Kristaps Porzingis chu technical foul vawi hnih a neih avangin dah chhuah a ngai. Hun pawimawh lai lakah Clippers lamin point kua neih belhin, point hnih chauh an hloh - a chungnung zawkah an ṭang chhunzawm.

Mavericks tan Luka Doncic-a'n point 42 leh assist vawi kua a nei a, rebound ṭum sarih a la bawk. Playoff a khelh hmasa berah a sulhnu a ropui nghal, mahse vawi 11 ngawt mai turnover a neih avangin a famkim tawk bik lo.

Toronto Raptors chuan inkhel bul an ṭan fuh chhawr ṭangkaiin Brooklyn Nets chu 134-110 in an hneh a, a tir lamah an chet fuh em avangin harsa lutuk loin hnehna an chang thei - zanin dar 11:00-ah game 2 an khel zui nghal ang.

Raptors hian a tirah basket an ngah, second quarter tir lamah phei chuan point 33 ngawtin hma an hruai fal. Fourth quarter-ah an inthlauhna hniam lai berin point kua a ni a, minute sarih vel khelh hmabak an la neih lei phei chuan 114-96 in an fal leh hman. Fred VanVleet chu Raptors tana player langsar a ni, ani hian point 30 a neih bakah assist vawi 11 neiin double-double a nei - playoff a khelh tawh china match pakhata point a neih hnem ber ṭum a tawng.

Regular season duhawm taka an hman hnuah Boston Celtics an hmuhnawm zel. Celtics hian Philadelphia 76ers chu 109-101 in an hneh, Ningani zing dar 4:00-ah game 2 an khel leh ang.

Philadelphia lamin quarter khatna an hmang ṭha zawk a, point khatin an sang hret. Jayson Tatum-a'n playoff a khelh china a point hmuh hnem ber ṭum tawngin point 32 a nei a, khel ṭhain hmuhnawm viau mah se a team chakpui nan erawh a tawk zo lo.

Celtics tan Jaylen Brown-a'n point 29 a nei thung, a point neih zinga 15 hi fourth quarter bika neih niin hemi quarter bikah hian 34-22 in an chungnung a, inkhel result danglam chhan pawh a ni. Celtics hi tlang tura rinkawi zawk an ni a, chutih rualin awlsam taka tlang theih erawh a ni bik lo ang.