Everton-in FA Cup fourth round an lut

FA Cup third round replay-ah Everton-in Crystal Palace 1-0 in an hneh a, Goodison Park-a inkhelah hian Andre Gomes-a'n goal awmchhun a khung. Toffees hian fourth round-ah Premier League club Luton Town an hmachhawn ang.

Fourth round-ah hian team 32 an la dam a, champion lai Manchester City an la dam. Champion ngun ber Arsenal erawh Liverpool hneh loin an tla. Maidstone United chu team la dam zinga hniam ber an ni a, anni hi National League South-a awm niin English football sixth division-a awm an ni.

Goal khat a tawk

Everton leh Crystal Palace te hi an intawn hmasak ṭumin goal awm loin an inhnethawk a, Selhurst Park Stadium-a inkhelah hian Toffees striker Dominic Calvert-Lewin chu minute 79-naah hnawhchhuah a ni.

Toffees hian FA Cup zawhah Premier League-ah Aston Villa goal awm loin an chelh a, hemi ṭum hian Calvert-Lewin-a'n hremna a hman zawh avangin January 17, Nilaini zan replay-ah hian English striker hian bul a ṭan.

Goodison Park-ah inkhel a nung a, chance nei ve bawk mah se chance ṭha bik tia sawi tur a tam lo. Mahse, minute 42-naah Andre Gomes-a'n ama freekick hlawhchhuah chu mawi zetin a pet lut a, Everton ṭantute thawm a ṭha hle.

Palace erawhin chance ngah zawk hret mah se an hun ṭha neih an hmang ṭangkai lo. Second half-ah pawh Odsonne Édouard-a'n hnai tak aṭangin a khung lo a, Naouirou Ahamada pawhin a hun ṭha neih a tauh lut lo. Chutihrualin João Virgínia-a'n a dang ṭha ve ve.

Palace an lawm lo

Crystal Palace an che ṭha lo a, match hnuhnung 11-ah vawi ruk an chak lo. Hei chauh hi an ni lo, Everton an hneh loh avangin manager Roy Hodgson kaihhruai team chu season hnuhnung pangaah FA Cup third round-ah vawi li an tla.

Second half-a forward Eberechi Eze an thlak laiin Palace fan-te Hodgson-a thutluknaah an lawm lo a, an boo hial. Palace harsatna belhchhah turin tunkar tawpah Arsenal an hmachhawn dawn a, hmabak a harsa dawn hle.