Super Cup-ah Mizo hming a mawi

Indian Super Cup-ah Nilaini Zan khan Odisha chuan 3-0 in Inter Kashi an hneh a, Mizo tlangval K. Lalṭhathanga (Puitea) leh Isak Vanlalruatfela ten goal khat ve ve an khung a, Diego Mauricio chuan goal khat a khung ve bawk.

Minute 45-naah Puitea hian goal hmahruai a khung - Jerry Lalrinzuala ball cross chu Inter Kashi keeper tawnhriat nei ṭha Arindam Bhattacharya chuan a hnek chhuak a, hei hi Puitea ke bulah tak tlain, mawi zetin goal-ah a thlawh lut.

Goal dang lut loa chawlhlawk hman a nih hnuah Diego Mauricio chuan minute 60-naah a belhchhah ve leh a, mahse, hetah hian a tawp lo - minute 79-na a ni a, Mizo tlangval inlar hun a ni.

Roy Krishna ball pek chu Inter Kashi defender pathum ven karah Isak-a'n tlan luhpuiin, ṭha zetin goal-ah a chantir a, I League club tan thawhleh ngaihna a awm tawh lo.

Odisha tan hian Jerry, Puitea leh Isak-a bakah goalkeeper Lalthuammawia chuan inkhel bul a ṭan a, Inter Kashi tan forward Edmund Lalrindika'n bul ṭanin, defender Lalruatthara chu minute 77-naah bench aṭanga luhtir a ni bawk.

Group D-ah Odisha hian FC Goa nen point ruk ve ve an hmu mek a, group khat aṭangin hmahruaitu chiah an tlang dawn avangin January 22, Thawhṭanni zana team pahnih intawng tur hi en a châkawm tawh hle.