Qatar-in last 16 an lut

Asian Cup thlengtu Qatar-in a vawi hnih nan hnehna an chang a, Asian Cup 2023-a round of 16 lut hmasa ber an ni - Qatar hian Nilaini zan khan Tajikistan chu 1-0 in an hneh a, match hmasa berah 3-0 a Lebanon an lo hneh tawh bawk avangin last 16 an lut fel der.

Al Bayt Stadium, Al Khor-ah inkhel en turin fans 57,460 zet an pungkhawm a, an beisei ang result an hmu. Qatar tan Akram Afif chuan minute 17-naah inkhela goal awmchhun a khung a, 1-0 in hnehna an chang.

Group A inkhel dangah China-in goal khung an harsat chhunzawm zel a, an hneh ngei tura ngaih Lebanon nen 0-0 in an inhnehtawk - China hian match hmasa zawkah Tajikistan chu 0-0 in an lo inhnehtawkpui tawh bawk.

FIFA ranking-a 79-na ni phak China hian a thlengtu Qatar an la hmachhawn leh dawn a, team nem zawk pahnih lakah an chak zawh loh avangin round of 16 luh beiseina a tlem ta hle.

Vawiinah Asian Cup hi khelh chhunzawm tur niin, match thum khelh tur a awm dawn a, tlai dar 5:00-a Japan leh Iraq inkhel tur hian ngaihven a hlawh ang.

Wataru Endo captain-na hnuaia khel Japan hian an match hmasa berah Vietnam chu 4-2 in an hneh a, he team hian player langsar tak tak kawl mah se, Vietnam lakah goal hnih ngawt an chhuah avangin team ṭha zawk Iraq lakah chuan fimkhur lehzual an ngai ang.

Japan squad-a player tam zawk hi European football khel niin, Arsenal defender Takehiro Tomiyasu, AS Monaco forward Takumi Minamino, Real Sociedad winger Takefusa Kubo leh Sporting Lisbon midfielder Hidemasa Morita te awmna an ni a, chutihrual chuan Iraq hi Spain assistant coach hlui Jesús Casas hnuaia khel niin, Dutch top flight league club FC Utrecht midfielder Zidane Iqbal, Portuguese top division club Vizela midfielder Osama Rashid leh Dutch club Heerenveen defender Hussein Ali te kawltu an ni a, awlsam taka hneh theih an ni bik dawn lo.