West Ham-ah Stuart Pearce a kir

Stuart Pearce chuan West Ham manager David Moyes-a thachhang dawltu ni turin London club a zawm leh ta a, first-team coach hna a chelh ang. 

Player a nih laia England tana vawi 78 inlan thei Pearce hi 2017-18 season tawp lama Moyes-a'n Hammers a enkawl khan coaching staff zingah a tel a, Moyes contract pawhsei a ni lo kha a lo sawisel tawh. 

Hammers-in season liam taah khan Manuel Pellegrini hoin season bul ṭan mah se beisei an phak lo a, December 29 khan a vawi hnih nan Moyes an lalut. Manchester United boss hluiin a hna ṭha takin a thawk a, relegate an pumpelh. 

Pearce hian January khan Moyes-a coaching staff zinga a tel loh chhan chu West Ham neituten a kir ve an rem tih loh vang niin a sawi a, mahse season a thar dawn meuh chuan a pu hlui bawk a zawm leh dawn ta. 

Player a nih laia West Ham tana season hnih lo khel tawh Pearce chuan, "Club neitu David Sullivan leh Karren Brady-te nen pawh kan inbe tawh a, ṭha takin kan inbia - ka lo kir tur hi an lawm hle a ni. 

"Hammers-a ka lo kir leh hian club chungchang chu thui tak a hrilhfiahin ka hria. Club, board leh manager-ten ruahmanna an siam hi thlawp lo ni ila chuan ka lo kir lo ang," a ti a, West Ham chungah rinna a nghat.