Fiahna paltlangtu Zverev

Alexander Zverev chuan tun hma lama a tih theih ngai loh tih a tum a, kawng erawh a awlsam dawn lo. Nimin khan Zverev hian player langsar ni lem lo Lukas Klein lakah fiahna hautak a hmachhawn a, harsa taka paltlangin Australian Open third round a lut.

John Cain Arena-a inkhelah, seeded parukna Zverev hian qualifying paltlanga inlan Klein-a hi 7-5, 3-6, 4-6, 7-6 (7-5), 7-6 (10-7) in a hneh hram, chak tur hian darkar li leh a chanve zet hun a mamawh hial a ni.

World number 163 Klein hian Grand Slam bikah chuan main draw chinah match hnih chauh a la khel a, tawnhriat a nei tlem hle - Zverev laka a khelh danah erawh chak zawk pawh ni se la thil mak a ni hran lo ang.

Olympic champion Zverev chuan, "Theih ni se la chuan darkar khat leh a chanve lekah hnehna chan ka duh, mahse tun ang aia ṭha a khelh leh dan kha chu ka hre chuang lo, match harsa tak ka paltlang a ni.

"A nihna tak sawi chuan Lukas Klein khan kei aiin hnehna chan a phu zawk," a ti. German tlangval hian a match lehpekah chuan world number 91 Alex Michelsen a tum dawn, a vawi khat nan Grand Slam nomawi chawi a duh a nih chuan set nga khel loa tlang theih a pawimawh ang.

Grand Slam-ah chuan match khelh tur a tam a, inelna tir lama thahrui hman tam hian a hnuah nghawng a nei ṭhin. Player ṭha bik Novak Djokovic leh Carlos Alcaraz te an la chak zel bawk si, nomawi inchuh boruak a sang chho dawn hle.

Nilaini zan khan world number 1 Djokovic chuan Rod Laver Arena-ah Alexei Popyrin chu 6-3, 4-6, 7-6 (4), 6-3 a hnehin second round a paltlang, a vawi 101 nana Australian Open champion nih tumin hmalam a pan zel.

World number 2 leh seeded pahnihna ni bawk Alcaraz pawh nimin khan a chak. Spanish tlangval hian darkar thum leh minute 25 chhungin Lorenzo Sonego chu 6-4, 6-7(3), 6-3, 7-6(3) in a hneh a, third round a inhlangkai ve bawk.