India tlangval Nagal zinkawng a tawp

Australian Open khelh laia India tlangval inlan thei awmchhun Sumit Nagal chu second round-ah a tla. Nimin khan Nagal hian Court 13, Melbourne Park-ah Shang Juncheng hneh loin a zinkawng a tawp.

Nagal hian first round-ah beisei phak baka ṭhain a khel a, world number 27 Alexander Bublik a hneh. Second round-ah pawh beisei a nei sangin a khel chhe lo, mahse Chinese tlangval lakah 2-6, 6-3, 7-5, 6-4 in a vanduai zawkah a ṭang.

Chak lo mah se Australian Open 2024 hi Nagal tan hriatreng hlawh tur a ni tawh. Indian mipa tennis player zingah chuan, Grand Slam bikah kum 35 hnua seeded player hneh leh thei hmasa a ni a, hriatreng a ni tawh dawn.

Nimin khan chak ni se la chuan Nagal hian world number 2 Carlos Alcaraz a hmachhawn zui leh ang, a hneh loh Juncheng zawkin Alcaraz a hmachhawn dawn ta tihna a ni.