Rinkai Morocco chak chiang

Africa Cup of Nations 2023 champion tura rinkai zinga mi Morocco chuan Nilaini zan khan an match hmasa ber an khel a, hun tawp lama player kim lo Tanzania chu 3-0 in an hneh.

Group F inkhelah Morocco tan hian Romain Saiss chuan chawlhlawk hmain goal hmahruai a khung, defender ṭha Hakim Ziyech-a freekick kal zelah goal hi a lut a, goal dang erawh kan hmu chhunzawm mai lo.

Hun tawp dawn lam minute 20 la awmah Tanzania player Novatus Miroshi chu hnawhchhuah a ni a, team nem zawk an nih bakah an kim loh tak avangin an bet zui a, inkhel thununtu Morocco lamin Azzedine Ounahi leh Youssef En-Nesyri te hmangin an khung belh.

Tun hmain Morocco hian AFCON nomawi hi vawi khat an chawi tawh, an hlawhtlinna awmchhun hi kum 1976 daih tawh kha a ni thung - nomawi an chawi lohna a rei ta vang vang hle a ni.

Tun hnaiah team an indin ṭha viau, 2022 World Cup-ah khan khawvel barakhaihin semifinal hial an thleng. Khawvel huap inelna lian berah hian Belgium, Spain leh Portugal te an hneh thei a, team ṭha lakah pawh an duai lo hle.

Walid Regregui-a naute hian tunah chuan European ram ṭha ni loin African ramte an el mek a, an ranking en chuan World Cup ai khan a awlsam zawk tura ngaih a ni, mahse AFCON boruak hi a danglam ṭhin avangin fimkhur taka an kal erawh a ngai dawn.

Morocco hian khawvel defender ṭha berte zinga mi Hakimi an nei a, Paris Saint Germain defender hian an goal hnihna hi a siamsak a ni. Hakimi bakah hian Chelsea player hlui Hakim Ziyech an nei bawk a, ram dang tan anni pahnih inkawp hi hmachhawn an awlsam lo.

Nilaini zan inkhel dangah DR Congo leh Zambia te 1-1 in an inhnehtawk. Zambia tana Kings Kangwa-a'n minute 23-naah goal a khung chu, goal luh aṭanga minute li hnu lekah Brentford forward Yoane Wissa chuan sutin goal dang erawh a lut zui lo.

Group F-ah Morocco chuan point thum hmuin hma an hruai a, an hnuah hian point khat nei DR Congo leh Zambia te awmin a hnuai berah point la nei lo Tanzania an awm thung a ni.