Player-ten min rin loh chuan ka chhuak ang - Xavi

Barcelona coach Xavi chuan a player-ten a chungah rinna an nghat ngam lo a nih chuan chhuah mai a hnial loh thu a sawi a, hei hian Catalan club chhungkaw boruak a fuh tawk lo tih a pholang.

Pathianni zan khan Spanish Super Cup final-ah Barcelona hian Real Madrid an hmachhawn a, 4-1 in an tlawm. An hneh loh team hi an hmelma kumhlun an ni miau a, fans tam takin 4-1 ngawta tlawm hi mualphonaah an ngai a, an la na.

Xavi chuan, "He club hi ka hmangaih a, he club tana tihtheih ve neih inbeiseia enkawl pawh ka ni. Mahse, chu ka beiseina chu ka tihlawhtling thei lo a nih chuan ka haw mai ang," a ti a, a hmachhawpte hlen ngei a duh.

Spanish coach chuan sawi zawmin, "Season hmasa khan La Liga nomawi chawi lo ila, he hmunah hian ka awm tawh lo ang. Ka player-ten ka chunga rinna an nghah loh niah chuan ka puanthuah ka tel ang a, he hmun hi ka chhuahsan ang.

"Mi tuin emaw buaina a awm thu min hrilh a nih chuan, ka chhuak ang," a ti a, Barca ṭhatna tur ber a ngaihtuah thu a sawi. Xavi hian season hmasa La Liga-ah Barca hi champion pui mah se, tun season-ah beisei an phak lo a, hmahruaitu Girona chu point riat ngawtin an phak lo mek.

Barcelona player a nih laia nomawi 25 ngawt chawitu Xavi hian Qatar club Al Sadd chhuahsanin, November 2021 khan Barcelona hi a enkawl ṭan a, hetihlai hian league-ah pakuana an ni a, pahnihna ni chungin season a kharpui.

Season hmasa kha season tluana Barca a enkawl hmasak ber niin, league-ah a champion pui nghal a, a hnathawh hi a chhe lo. Xavi chuan, "Club neituten Qatar aṭanga min sawm chhuah khan, club chanchina hun thim ber an tawn mek thu min hrilh a, chu chu tunah hian thlak danglam kan tum mek a ni," a ti.

Barca hi Spanish Super Cup final-ah chak lo mah se, Champions League round of 16 an lut a, nizan khan Copa del Rey round of 16-ah third division club Unionistas hmachhawn bawkin, an result kan hre hman lo.

Xavi chuan, "Ka chi ai lo - nomawi pathum chawi tur ka la nei a, tunah hian hlawhchhamna aiin hlawhtlinna kan hnaih zawk," a ti a, a inrintawk thu a sawi.