Harsa takin Swiatek a chak

Australian Open khelh laiah, hmeichhe singles champion tura rinkai Iga Swiatek chuan harsa takin second round a paltlang. Player langsar Jessica Pegula erawh third round lut phak loin a zinkawng a tawp thung.

Nimin Melbourne Park-a inkhelah, seeded pakhatna Swiatek leh Danielle Collins te an inbei tawk hle, set hnuhnnung ber hmangin chak tur an chingfel. World number 1 hi set thumnaah 4-1 in a hnufual hman, a service vawi hnih a hloh.

Mak tak maiin darkar thum leh minute 14 an inkhelh hnuah Swiatek hi 6-4, 3-6, 6-4 in a chak. Swaitek chuan, "Thlawhtheihna ṭum hmuna awm hman ang ka ni," tiin a chak loh teuhzia a sawi a, haw mai thei dinhmuna a din hman thu a zep lo.

Grand Slam vawi li champion tawh chuan sawi zawmin, "A tawp thlengin theihtawp a beih kha ka tum tawp mai a, ka khingpui kha a khelh ṭhat em avangin inkhel boruak tih danglam pawh kha a harsa takzet, a tawpah erawh ka vannei," a ti.

Inkhel dangah seeded pangana Jessica Pegula chu Clara Burel lakah 6-4, 6-2 in a chak lo, tun inelna neih laia hmeichhe singles player tla tawh zinga ranking sang ber a ni, a hneh loh Burel hi world number 51-na daih a ni thung.

Champion lai Aryna Sabalenka erawh a la chak zel. Seeded pahnihna Sabalenka hian kum 16 mi Brenda Fruhvirtova chu 6-3, 6-2 a hnehin third round a inhlangkai, a match lehpekah chuan Ukraine mi Lesia Tsurenko a hmachhawn leh dawn a ni.

Sabalenka chuan, "Ka khingpui kha a kum ngaihtuah chuan a khel thei ka ti hle, kum 16 mi chauh la ni mah se a puitlingin harsatna hrang hrang min siamsak hnem hle, tluang taka a khel zel a nih chuan hmabak a nei eng hleah ka ngai," tiin world number 107 Fruhvirtova a fak.